Hiru egunez jarraian atxilotu dute gizon bat, laban batekin mehatxatu eta erasotzeagatik
Ostiral goizaldean gizon bat erasotu zuen laban batekin eta larunbat goizaldean, berriz, asteazkenean mehatxatu zuen emakume berbera jazarri eta mehatxatu zuen.
Pasa den asteazkenean izan zen lehenengo atxiloketa. Segurtasun Sailak jakinarazi duenez, ostegunetik ostiralerako goizaldean, ordubiak inguruan, berriro atxilotu zuten 27 urteko gizona, udaltzainek kasu horretan, taberna batean gizon laban handi batekin ustez erasotzeagatik. Homizidio saiakera leporatuta atxilotu zuten.
Ostiraletik larunbaterako goizaldean, berriz, asteazkenean erasotu nahi zuen emakumearen bila joan zen taberna batera. Kanpoaldean geratu zen, eta gerturatzeko keinuak egin zizkion, labana erakusten zion bitartean. Emakumea taberna barruan geratu zen, eta gizonak alde egin zuen. Iturri berak adierazi duenez, emakumeak etxerako bidea hartu zuenean, berriro agertu eta jazartzen hasi zitzaion. Beste taberna batean gorde, eta handik Ertzaintzari eman zioten abisua. Arma batekin mehatxatzeagatik atxilotu zuten, eta epailearen esku utzi zuten, hirugarren egunez jarraian.
