Txartelik ez izan arren bihar goizean Zurriolara joatera deitu du Gure Esku Dago dinamikak
Zurriolako Mosaikoan 5000 lagun biltzea zen erronka eta jada 10.000 lagunek eman dute izena jada; igandean, Behobia-Donostia bitartean koloretako aterkiak zabaltzeko eskatu dute.
Aurreikuspen guztiak gaindituta, bihar Zurriolan egingo duten mosaikoa handitzeko lanari ekin dio Gure Esku Dago dinamikak. Herri gehienetan txartel guztiak agortu dira –Errenteria-Orereta eta Pasaia kasu– baina bihar bertan Donostian erosteko aukera izango dela jakinarazi berri dute antolatzaileek, eta beraz, txartelik ez izanda ere, hondartzara joateko deia zabaldu dute, mosaikoa zena mobilizazio erraldoi bilakatzeko.
Bide batez, igandean Behobia-Donostia lasterketa ikustera irtetean koloretako aterkiak eramateko deia zabaldu du Gure Esku Dagok, Katalunian bezala Euskal Herrian ere erabaki nahi dugula aldarrikatzeko.
