Kontadoreen teleirakurketa zerbitzua abian jarriko du Hondarribian Txinzerrek
Errandoneako urtegitik ura hartzen duten 8.540 kontagailu aldatuko dituzte. Bederatzi hilabete prozesua izango da, eta herritarrei informazio zehatza emango diete.
Txingudiko Zerbitzuak erakundeak jakinarazi du Errandoneako urtegitik ura jasotzen duten 8.540 erabiltzaileri, teleirakurketa zerbitzua ezarriko dietela datozen hilabeteetan. Etxebizitzak, dendak, komertzioak, lokalak, enpresak… dira egitasmoan sartuko direnak. Aldaketa bederatzi hilabetean zehar egingo dute, eta Txinzerrek milioi bat euro inguruko inbertsioa egingo du. Irunen iaz osatu zuten guztiz zerbitzua, 30.000 kontagailuetara iritsiz. Gaiaren gaineko informazio zehatza emango die herritarrei Txinzerrek.
Zerbitzuaren bitartez, Txinzerrek zuzenean jasoko ditu uraren kontsumoaren datuak bere bulegoetan, ez du inork joan beharko etxeetara edo bestelako egoitzetara irakurketa egitera. Gainera, erakundeak adierazi duenez, sistema horrek aukera ematen du ur jarioak goiz sumatzeko, fakturazioa egiazko kontsumoaren araberakoa izatea, edo herritarrek euren kontsumoa on-line kontsultatzeko.
Aqualogy Solutions eta Ikor Metering enpresei esleitu die Txingudiko Zerbitzuak-ek kontagailuak aldatzeko nahiz beharrezko tresna guztiak jartzeko ardura.
