48-6 irabazi du Irun RTk Funesko taldearen aurka
Etxean aritu ziren irundarrak eta Plaiaundin irabazitako lehen partida izan zen larunbatekoa. Funesko taldea ez zen oso bizi ibili eta Irunek aukera guztiak baliatzen asmatu zuen.
Plaiaundiko zelaian aritu zen larunbatean Irun Rugby Taldea CM Funes Rugby taldearen kontra. Erraz lortu zuten irundarrek aldeko markagailua eta 48-6ko garaipena eskuratu zuten etxekoek azkenean. Plaiaundin irabazitako lehen partida izan zen larunbateko jardunaldikoa.
Partida hasi eta lehen minututik lehia menderatzea lortu zuen Irun RTk. Hala, Ugo Poncini jokalariak entsegu bat eraldatzea lortu zuen, 7-0 aldeko markagailua lortuz. Funesek erasoari erantzun eta 4. minutuan markagailua irekitzea lortu zuen 7-3ko emaitzarekin. Hurrengo bi jokaldiak antzekoak izan ziren eta 12. minuturako 14-6ko markagailua ikus zitekeen Plaiaundin.
Hori horrela, atsedena heldu zenerako, Irunek eraldatutako entsegu bati eta zigor kolpe bati esker, 26-6 aldeko markagailua zuten.
Bigarren denbora lehenaren antzekoa izan zen. Funesek ez zuen puntu gehiagorik lortu eta Irun RTk eraldatutako hainbat entsegu lortu ondotik bukaerako markagailua 48-6koa zen.
Aste honetan Irun RTk ez du partidarik jokatuko eta hurrengoan, hilaren 15arekin, Gasteizko Gaztedi taldearen kontra indarrak neurtuko ditu.
