Oiartzun Arraun Elkartea sortu dute
Oiartzunek badu arraun elkartea, Oiartzun Arraun Elkartea. Eta jada uretara joan nahi dute lehiatzera, izan ere asmoa dutelako 2014-2015 sasoian konpetizioetara aurkezteko. Baina horretarako arraunlariak behar dituzte, neskak eta mutilak, kadete, haur, gazte eta senior mailetakoak. Eta horiek animatzeko, mezu garbia zabaldu dute: “Berdin dio ez badakizu arraunean, guk erakutsiko!”. Hori guztia aurrera eramateko Pasai Donibane Koxtape-San Juan arraun taldearekin tratua egin dute.
Gainera, badituzte helburuak. Neska seniorretan trainerua osatzeko asmoa dute, baina aurretik bateletan nahiz trainerilletan ariko lirateke. Traineruaren kasuan Gipuzkoako Liga jarri dute mugarri. Gizon seniorretan KAE2 Ligan nahiko lukete atera trainerua, aurretik beheko mailetan aritu ondoren, eta gazteenen kategorietan herrialdeko batel nahiz trainerilla ligetan parte hartuko lukete.
Entrenamendu saioak Pasai Donibanen egingo lituzkete.
Elkarte sortu berrian izena emateko bi aukera daude. Batetik Elorsoro kiroldegira joan daiteke egitasmo berriaren partaide izan nahi dela esatera. Bestela posta elektroniko bat ere prest dute: oiartzungoitsaslapurrak[a bildua]gmail.com.
