Sortun jarraitu ez zutenek Abots-Anitz abiatu dute
Iazko alardearen ondoren herriko ezker abertzalearen barruan izan zen eztabaidaren ondotik Sorturen egituran ez jarraitzea erabaki zutenek Abots-Anitz eratu dute, komunikabideei bidalitako ohar batean jakinarazi dutenez. Oharrean azaltzen dute konponbiderako ahaleginak egin zirela baina bi aldeak ez zirela ados jarri: “Hondarribiko Ezker Abertzalearen herri batzarraren gehiengoaren eta Sortu-ren egituren artean azken hilabeteetan hainbat ezberdintasun izan dira. Ezberdintasun hauek konpontzeko asmoz hainbat ahalegin gauzatu dira. Prozesu honen amaieran ez dira beharrezko adostasunak lortu eta honek ondorio ezberdinak utzi ditu herrian”.
Orain arte Hondarribia Herria Aurrera izena erabili izan dute behin behinekoz baina hemendik aurrera Abots-Anitz bezala funtzionatuko dute. “Ezker Abertzalearen herri batzarraren gehiengoek lanean jarraitzeko autua egin dugu eta Hondarribia ezkertiar eta abertzale baten alde biltzeko gune bat eratu eta lanean jarraitzeko konpromisoa hartzen dugu”.
Bukatzeko, erabakitzeko gunea herri batzarra izango dutela gaineratu dute eta gune irekia izango dela: “Herri batzarra izango dugu erabaki gune garrantzitsuena. Ezker Abertzalearen batzarra herriko talde zein elkarte ezberdinetako kideei irekita egongo da eta nola ez gurekin bat egin nahi duen herritar orori ere”.
