Moda tailerrean izena emateko epea maiatzaren 23ra arte luzatu dute

admin

Bidasoa

2014/05/19

Ezkerrean Itsaso Petrikorena zuzendaria eta ondoan San Martin zinegotzia

Irungo Udaleko Gazteria departamentuak Art wearables – Eramateko artea tailerrean izena emateko epea maiatzaren 23ra arte luzatu duela jakinarazi du gaur goizean. Fernando San Martin zinegotziak eta Itsaso Petrikorena moda tailerreko zuzendariak eman dute aldaketaren berri. Izan ere, aurten jende gutxik izena eman duela eta, bultzada eman nahi diote era honetan ikastaroari. Moda tailerraren bigarren ekitaldia izango da aurtengoa. Iaz arrakasta handia izan zuela onartu dute San Martinek eta Petrikorenak.”Iazko tailerrarekin desberdintasun nagusia da, batez ere, Emausek emandako materialekin collage bat egiten zentratu ginela” azaldu du Petrikorenak. “Aurten aldiz, artearen eta modaren mundura zabaldu nahi dugu, arte ibiltaria edo ehunaren arkitektura eginez”. Horiek horrela, Emausen lankidetzarekin aurrera eramango dute tailerra eta beraz, birziklatutako artea deritzona garatu nahi dute. “Erabilitako modaren kontzeptua, zaharra, bezala ulertzen dugu”, kontatu du Petrikorenak. “Desberdin pentsatzen ikasi behar dugu, freskagarria, ezberdina bezala ulertu behar dugu. Ea bide bat egitea lortzen dugun, beste ideia eta filosofia batzuk garatuz”, erantsi du. Era berean, “estereotipoen moda” alboratzen ikasi behar dela azaldu du tailerreko zuzendariak. “Moda eta joera diktatorialak alde batera utzi behar ditugu, denen araberako moda egin daitekeelako”. Denera, 15 leku dauzka moda tailerrak, debalde da, eta 18 eta 25 urte arteko gazteei zuzenduta dago. Cristobal Balenciaga Museora ere bisita egingo dute ikasleek ikastaroaren barruan. Informazio gehiagorako Gazte Bulegoaren webgunera jo dezakete interesatuek.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.