Irabazi arren Lehen Erregionaleko taldea ez da Preferentera igo
Hondarribiarrek 0-3 irabazi zuten Eibarren baina Pasaiak hiru puntuak lortu zituen Beasainen eta pasaitarrak igo dira Preferentera. Hondarribiko bigarren taldeak azken aukera bat izango du, Idiazabalen kontrako zuzeneko kanporaketan.
Hondarribiko bigarren taldeari gol bat falta izan zaio Preferentera igotzeko, Beasainen gol bat. Hondarribiarrek egin beharrekoa egin zuten igoera faseko azken partidan, Armagiñak taldeari Eibarren irabaziz (0-3). Baina Pasaiak Beasain liderraren etxean ez irabaztea ere behar zuten, eta hori ez da gertatu, pasaitarrek 0-1 irabazi baitzuten. Hala, gol horrek igoera eman dio Pasaiako bigarren taldeari eta heldu den urtean Preferenten jokatuko du.
Hondarribiarrek azken aukera bat izango dute igotzeko. Datozen bi asteburuetan Idiazabalen kontra jokatuko dute. Kanporaketa horretan nagusitzen dena datorren urtean Gipuzkoako bigarren ligan ariko da; hondarribiarrak igoko lirateke lehen taldea ez bada Ohorezko Mailatik jaisten.
Idiazabal igoera faseko lehen multzoko hirugarren tokian geratu da, 34 punturekin, Hondarribiak bigarren multzoan lortu dituenak baino puntu bat gutxiago. Aurten ez dute oraindik berdeen aurka jokatu, lehen fasean bosgarren multzoan aritu baitziren. Azken fasean, bi multzoak hartuta gol gutxien jaso izan dituen taldea da Idiazabal —17 gol 18 partidatan—. Hondarribia, aldiz, gehien sartu dituena, 53 gol. Ikusteko dago biak aurrez aurre jarrita zein nagusitzen den, defentsa ala erasoa.
