Gauza perfektuak
Zuretzat, zer da zoriontasuna? Galdera potolo hori, ezta? Potoloegia akaso. Batzutan, besteek egindakoa. Askotan norberak bere buruari galdetzen diona. Eta hain ohikoa aldizkarietako elkarrizketetan, batez ere aktore, musikari eta halakoei egindako elkarrizketetan.
Eta erantzuna bilatzea, askotan, ez da erraza. 2.000 karaktere motz geldi daitezke galdera hori erantzuteko. Edo luze. Luzeegi ere suertatu daitezke 2.000 karaktere galdera hori erantzuteko.
Zoriontasuna deitzen diote, batzuek, diruari. Beste batzuek, arrakastari. Edo zale diren futbol taldeak Championsa jokatzeari.
Zoriontasuna ez dela existitzen esaten duenik ere bada. Une zoriontsuak bai, baina zoriontasun eterno eta konstantea ezinezkoa dela… Eta ni ados nago hori uste dutenekin.
Urtero apuntatzen dut sandaliak zein egunetan jantzi ditudan lehenengo aldiz (bai; denok ditugu gure liturgia arraro eta bereziak, hau nireetako bat izan liteke). Iaz, ekainaren 14an izan zen. Madrilen. Ostiral gau batez. Trenetik jaitsi eta lehenengo gauza horixe izan zen: maletatik sandaliak ateratzea. Bigarrena, galtzerdiak eta zapatak sartzea.
Aurten, maiatzaren 10ean izan da egun seinalatua. Aurreko larunbatean Zaragozan, 31 gradutan, aurten lehen aldiz kendu ditut galtzerdiak eta botinak, eta jantzi ditut sandaliak. Eta arnasa hartu dute nire behatzek. Eguzkia, haizea, kalea… sentitu, dastatu, usaindu, ikusi dute. Ia-ia entzun nituen «eskerrik asko, Goiatz!» esaten, emozioak jota.
Ireki nuenean oinetakoen armairua, maleta prestatzen ari nintzela, eta zein sandalia pare eraman aukeratzen hasi nintzenean —zein sandalia parek izango zuen aurten jantzitako lehenengoak izateko, eta historiarako apuntatuak gelditzeko ohorea aukeratzen ari nintzela, alegia—, denak jantzi nahi nituela konturatu nintzen.
Oinetako politenak dira sandaliak. Dudarik gabe.
Rafa Ruedak, Kirmen Uribek hala idatzita, Zaharregia, txikiegia agian diskoko Gauza perfektuetan kantatu zuen sandaliek zapatentzat eskeletuen antza dutela. Niretzat, sandaliek zoriontasunaren antza dute.
Beraz, hona zoriontasunaren nire definizioa (udaberrian behintzat):
ZORIONTASUN (iz.): 1. Zoriontasuna da sandaliak jantzita sentitzen den zirrara hori.
Eta zuretzat, zer da zoriontasuna?
