Emozioak eta harremanak, Jabekuntza Eskolan aztergai
Irungo Udalak bultzatutako emakumeen Jabekuntza Eskolak bi tailer antolatu ditu hil honen bukaerarako eta ekainaren hasierarako. Adimen emozionala eta generoa izango da lehena, eta Gure harremanak eta galerak lantzen, bigarrena. Bi tailerrak gaztelaniaz antolatu dituzte.
Adimen emozionalaren inguruko teoria erabiliz garatuko dute lehen tailerra Jabekuntza Eskolako arduradunek. Jarduera praktikoak aurrera eramanez, adimen emozionalak norberaren garapenean duen eragina ikusiko dute parte hartzaileek. Ongizatea garatzeko duen garrantziaz jabetzea, eta baliabide propioak erabiliz egoera pertsonal eta profesional jakinak nola aurpegiratzen ikastea izango dira tailerraren ildo nagusiak. Maiatzaren 23an 16:00etatik 20:00etara, eta 24an 10:00etatik 14:00etara emango dira eskolak, Oiasso museoan.
Gure harremanak eta galerak lantzen tailerrari dagokionez, maitatutako pertsonen gaineko harremanak eta batez ere, bikote kidearekin garatutako erlazioaren gainean hausnarketa burutuko dute parte hartzaileak. Hala, eguneroko zailtasunak identifikatzen jakitea, harreman batean bakoitzak betetzen duen rola eta horrek dauzkan ondorioak landuko dira tailerrean. Era berean, antsietatea gutxitu aldera, bizitza osoan zehar pairatutako dolu prozesuak aurpegiratzeko baliabideak aztertuko dira. Azkenik, norberaren gorputzaren gaineko ardura izaten ikasiko dute parte hartzaileak, arnasketa, atsedena, eta norberaren egoeraz jabetzeko tresnak jasoko dituzte, bakoitza bere bizitzaren gaineko kontrola nola hartu identifikatzen ikasteko. Maiatzaren 22 eta 29an, eta ekainaren 5ean garatuko dira eskolak goizez (10:00-12:30) edo arratsaldez (16:00-18:30).
Izen emateak HAZen 010 telefono zenbakian edo udalaren webgunean (gaztelaniaz) egin daitezke. Tailerrek 7 euroko kostua dute.
