Moda tailerraren bigarren ekitaldia hil honen erdialdean abiatuko da
Gazteartean programak Art wearables – eramateko artea moda tailerraren bigarren ekitaldian izena emateko epea abiatu du dagoeneko. Maiatzaren 15era arte zabalik egongo da epea, eta hurrengo egunetik ekainaren 19ra arte luzatuko dira eskolak. Denera, 15 plaza eskainiko dira, debalde izango da eta 2013koa bezain arrakastatsua izatea aurreikusi dute.
“Modan interesa duten gazteak plastikaren ikaskuntzaren eta janzkera esperimentalaren bidez beren sorkuntzak garatzera gonbidatu nahi ditugu” azaldu du Fenando San Martin Gazteria zinegotziak. Gainera, aurtengoan ere Emaus fundazioaren laguntza jasoko du tailerrak. Lankidetza honi esker, “moda iraunkortasunaren eta birziklapenaren ikuspuntutik ulertzen laguntzen ditu ikasleak” gaineratu du zinegotziak. Zentzu horretan, manikiak, arropak, botoiak, oihalak… Emausek emandakoak izango dira.
Horiek horrela, Itsaso Petrikorena proiektuaren arduraduna eta eskoletako gidaria izango da. Arte Ederretan lizentziatua izateaz gain, arlo berean master bat dauka Petrikorenak. Moda diseinatzailea eta diseinatzaile grafikoa ere da arduraduna, eta eszenografia zein jantzi alorretako espezialitate ezberdinetan lan esperientzia zabala dauka, Europan eta AEBn.
Tailerra
Maiatzaren 16tik ekainaren 19ra bitartean emango dira eskolak Martindozenea gaztelekuan. Bi orduz bilduko dira ikaskideak ostiralero, azken egunean izan ezik, ostegunean egingo dutela. Horrez gain, Balenciaga Museora bisita ere proposatu dute tailerreko arduradunek. 18 eta 25 urte arteko gazteei zuzenduta dago ikastaroa. Bertan parte hartu nahi duten lagunek bertan egin dezakete maiatzaren 15era arte.
