Hondarribiko Pro-Am lehiaketako bikote finalistak
Pro-Am Hossegor-Hondarribia lehiaketaren finala jokatu zuten atzo arratsaldean Hondarribiko Jostaldi pilotalekuan. Moresmau-Ibai Erkiaga bikoteak irabazi zuen finala, Egiguren-Etcheverryren aurka jokatu ondoren. Hirugarren postua Korta-Lignau bikoteak eskuratu zuen. Hossegorren (Okzitania) eta Hondarribian jokatutako lehiaketa Jai Alai Word Tourren barruan kokatzen da. Honen bidez sailkapen postuak erabakitzeaz gain, ranking-erako puntu berriak eskuratu dituzte parte hartzaileek.
Horiek horrela, Moresmau-Erkiaga bikoteak 2-0 irabazi zuen Egiguren Etcheverryren aurka. Partida berdindua izan zela adierazi dute antolatzaileek.
Hirugarren postua lortzeko lehiatu zirenen artean, Korta-Lignau bikotea gailendu zen. Hala, Treku-Suso bikotea podiumetik kanpo gelditu zen. Kasu honetan ere, partida parekatua izan zela azaldu dute antolatzaileek, baina azkenean, 2-0 irabazi eta hirugarren postuan sailkatzea lortu zuten Kortak eta Lignauk.
Txomin Sagarzazu Kirol zinegotziak, Jaime Ochoa Munduko Pilota Batzarreko ordezkariak eta Jony Amboage Hondarribiko Pilota Eskolako ordezkariak burutu zuten sari banaketa.