21.097 metro egin beharko dituzte Irungo I. Maratoi Erdian
21 km eta 97 metroko distantzia egin beharko dute bihar Irungo I. Maratoi Erdian parte hartzen duten korrikalariek. Zirkuitua 13,5km-koa izango da, eta lehen itzuli osoa eman ondoren horren parte bat errepikatu beharko dute parte hartzaileek. 11:00etan ekingo diote lehiari, Zabaltza plazatik abiatuta. Patinatzaileak ikusteko aukera ere izango da bihar.
Milatik gora dira dagoeneko I. Maratoi Erdi honetan izena eman duten lagunek. Dortsalak bertan ezarritako karpan jaso ahal dira. Gainera, izena emateko epea gaur gaueko 00:00etan itxiko dute antolatzaileek. Interesa duten lagunek haien webgunearen bidez egin dezakete. Guztira, 2 ordu eta 30 minutuko denbora izango dute korrikalariek zirkuitua bukatzeko.
Korrikaz gain, antolatzaileek jakinarazi dutenez patinatzaileen arteko lehia ere izango da bihar. Korrikalariak abiatu aurretik aterako dira patinatzaileak; 10:55an zehazki eta egin beharreko ibilbidea 13.250 metrokoa izango da. Horiek egin beharreko zirkuitua asfaltatutako guneetan diseinatu dute eta itzuli bakarrekoa izango da.
Ibilbidea
Irteera zein helmuga Zabaltza plazan finkatu dute Irungo I. Maratoi Erdiko bultzatzaileek. Beraz, Zabaltza plazatik Hondarribia kalerantz abiatuko dira lehenbizi korrikalariak, Letxunborro hiribidea hartzeko. Puianako biribilguneraino igoko dira eta handik Zabaltza plazarainoko bueltako bidea egingo dute (5,5km). Ondoren, Nafarroa hiribidea zeharkatu eta Meaka auzorantz abiatuko dira, Ola sagardotegiraino ailegatuz eta berriz ere, bueltako bidea hartuko dute Udaltzaingoaren komisariara iritsi arte (10,6km). Bertan, Oxinbiribileko bidegorria hartuko dute lasterkariek Santiago kalera iritsi arte, handik Junkal eliza, San Martzial aldapa, kale Nagusia, Foru kalea, Luis Mariano zeharkatuko dituzte, berriz ere Zabaltza plazara (13,5km) iristeko eta era horretan, bigarren bueltari ekiteko. Bigarren itzulian, Zabaltza plazatik Olarako bidea eta buelta errepikatuko dute.
