Hondarribiko Herri Olinpiadetako bigarren jardunaldiko kronika serioa

Igandean egin zuten Hondarribiko Herri Olinpiaden bigarren jardunaldia. Hamar probaz osaturiko ginkana egin zuten eta oraindik ez dago sailkapen ofizialik; hainbeste izan dira atzemandako irregulartasunak, ezen proba guztiak errekurrita daudela. Hirugarren eguna San Pedro kalean egin nahi dute baina alkateak eskatu die Pasai San Pedron egiteko, nahi duten kalean.

admin

Bidasoa

2014/04/15

Hamar probaz osaturiko ginkana burutu behar izan zuten

Igandean egin zen 2014ko Hondarribiko Herri Olinpiaden bigarren jardunaldia. Egin zen, baina ozta-ozta egin zen, batzorde olinpikoak ia-ia suspenditu baitzuen, oso berandu hasi zelako. Gauza da talde gehienetako kirolari askok arazoak izan zituztela Madalen plazara iristeko, bezperan poteo olinpikoa non zen aurkitzeko zalantzarik eduki ez bazuten ere. Horregatik batzordekoek eskaera egin zuten berandu iritsitako taldeak lehiatik kanporatzeko, baina orduan ohartu ziren batzordeko kideak euren taldeak ere falta zirela eta azkenean ez zen ezer gertatu. HITZAk jakin izan duenez, itzulpen arazoak izan zituzten askok eta ez zituzten behar bezala ulertu antolatzaileen azalpenak. “Bagenekien asteburu honetan ginkana eta triki poteoa zeudela baina aldrebes ulertu genuen”, eta bat baino gehiago —dozenaka— larunbat arratsaldean aritu zen ginkana egiten, batzuk limoiakin beste batzuk tonikarekin, “eta igande goizean triki proba egin behar zela uste genuen”. Larunbateko triki poteoko azkarrenak ordubiak aldera joan ziren etxera, baina asko izan ziren ordu txikietan entrenatzen aritu zirenak, beroketak egiten, eta oso berotuta agertu ziren estadio olinpikora. Ez ziren aurpegi txarrarekin azaldu, baina aurpegia erabat aldatu zitzaien DJ Aristik lehen aldiz sirenari eragin zionean. DJ Aristi aritu zen tekniko lanetan eta Koldo Emeryk zeremonia maisu bezala errepikatu zuen, oraingoan Olinpiadak TBko aurkezle Jonas Ormaberaren laguntza izan zuelarik. Bionttuak taldearen alde aritzea leporatu zioten Ormaberari baina berak hori ukatu zuen: “Ez dakit zergatik esaten didaten hori, ni partziala naiz, gora Bionttuak”, esan zigun. Ginkana proba zegoen iragarrita atzorako, hamar probako ginkana. Kirol Jokoaren arabera Zahartrosis taldea zen faborito, “ez zutelako bezperako triki poteoan parte hartu”, baina antza gaixotasuna ez dute erabat gainditu eta igande goizeko lehiara ere ez ziren azaldu. Bi proba geratzen direnean asko arriskatu gabe esan daiteke 2014ko Hondarribiko Herri Olinpiadak ez dituela Zahartrosis taldeak irabaziko, ez bada beste talde guztiek Malasia aldean hegazkin bat hartzen dutela denak batera. Edo denak kanporatzen dituztela dopinaren aurkako azterketetan. Atzo aukera ona zen horretarako, baina pixa egiteko poto guztiak agortu omen dira merkatuan eta ezin izan da kontrolik egin, ez olinpiadetako bigarren jardunaldian, ezta Euskal Herriko Txirrindulari Itzulian. Hamar proba erraz Hamar probaz osatutako ginkana zen egitekoa igandean. Proba errazak ziren, eta lehiaketa sistema ere aise ulertzekoa, nahiz eta Emeryri eta Ormaberari asko kostatu zitzaien barneratzea. Bi txandatan egin zuten, aurrena hamar taldek batera, eta bigarren txandan bederatzi. Parte hartzen ez zutenak antolatzaile lanetan aritu ziren. Bi minutuz probaren azalpena jasotzen zuen talde bakoitzak, ondoren lau minutu zituzten proba gainditzeko, eta sirena hotsa entzuterakoan hurrengo probara pasatzen ziren; hor berriro, beste bi minutu azalpenak entzuteko eta lau probarako. Taldeak probaz proba pasatzen ziren bezala, hala egiten zuen publikoak ere, proba guztiak gertutik jarraitzeko. Japoniako turista batzuk —ez zuten japoniar itxurarik baina bakarrik beraiei okurritzen zaie halakorik, hortaz, japoniarrak behar zuten, nahiz eta gurasoak seguruenik Frantziakoak— probetaraino barruraino sartu ziren eta talde batzuek hori aprobetxatu zuten tranpak egiteko. Batzorde olinpikoak bideoak eskatu ditu tranpak egin dituztenak identifikatzeko eta neurriak hartzeko, eta ikerketaren emaitzak aldaketak eragin ditzake sailkapenean. Nolanahi ere, denbora beharko dute, Olinpiadak TBri eskatu baitizkiote bideoak eta medio horretan ez dira bereizten gauzak azkar egiteagatik, ondo bai, inork baino hobeto, baina azkar…

Kirolari bat, boligrafoaren probaz gozatzen

Honakoak izan ziren olinpiadetako bigarren jardunaldiko ginkana osatu zuten probak, ordenean [nik idatziko dudan ordenean]: piramidea osatzea (edo antzerako zerbait), marraztutakoa zer den asmatzea, biren gainean beste hiru taldekide jartzea (edozein teknika erabilita), botila betetzea iturritik ura ahoan eramanda, soka saltoa, uretatik ahoarekin txanponak hartzea, eskurik gabe kanaberatik sagarra jatea, ipurdiarekin boligrafoa botilan sartzea, begiak itxita jogurta elkarri ematea, eta asmakizuna mimikaren bidez. Esan dugu probak errazak zirela, gehienak txikitan udalekuetan egiten ziren horietakoak, horregatik bi minutu nahikoak izaten ziren funtzionamendua azaltzeko. Ashkorax taldekoek, baina, bi minutu baino gehiago behar izan zuten probaren batean, ja ez dutelako ezer gogoratzen haien txikitako garaiaz. Gainontzeko taldeekin arazorik ez, printzipioz, baina gerora ikusi zen ez zutela ondoegi ulertu eta zeinen errua izan ote den, hori ere ikertzen ari dira. Esaterako, soka saltoan, soka ukitu gabe salto egitea zen xedea, batzuk hori ulertu zuten, baina taldekako lana zela eta atzekoari ere lekua utzi behar zitzaiola ez, taldeko sei kide kabitu behar zirela. Azkenean ia talde guztiek gainditu zuten proba, baina udalak gazteen kontrako salaketa jarri du soka salto probagatik. Izan ere, lehen eguneko suziri eta trakaren eraginez San Pedro kalean altxatu eta berriro jarri behar izan zituzten adokinak, beste behin altxatu omen dira jauzien eraginez, eta txinoen dendan ez zaizkie gehiago geratzen. “Garaiz iristen ez badira, aste santuko ekitaldi guztiak bertan behera utzi beharko ditugu”, esan du Kanpo Harremanetarako zinegotziak. Soka saltoarekin bezala, proba gehienetan izan ziren irregulartasunak, nahiz eta esan dugun zinez errazak zirela. Jogurtak jateko proban parte hartzaileek ez zuten ulertu helburua zela jogurt ona eta kadukatua zegoena bereiztea, eta asko dira iraungitze data pasatutakoa jateagatik oraindik ingresatuta daudenak. Igande arratsaldeko poteoan hasi ziren jogurtaren eragina pairatzen. Jogurta jan gabe gaixotu direnak ere badira, jogurta usaindu edo usaindu duen norbaiten ondotik pasa den norbait ezagutzen dutelako kutsatu direla uste da. Hori ere ikertzen ari dira eta bideoak eskatu dituzte. Eta uretatik monetak jasotzeko proban dirua falta izan da, eta diru hori ez da agertu dirua biltzeko kaxa horietan, falta den dirua gehiago delako bildutakoa baino. Esan gabe doa dirua biltzeko bi kaxa pasatu zituztela, eta kaxak egiteko materiala ordaintzeko behar zutena ere lortu ez zutela. Gainera, Diru Kontuen Euskal Epaitegitik ikerketa abiatu dute eta une honetan kutxak haien esku daude. Lehen kutxarekin ez omen dago arazorik, baina bigarrenarekin susmoa dute epaitegian, Alderdi Popularraren ‘B’ kutxa izan daitekeela uste baitute.

Jogurtaren zaporea aukeratu zitekeen

Baditugu irregulartasun gehiagoren susmoak, baina denak ez ditugu jarriko; batzuk hain dira nabarmenak, horiek jarriz gero, irakurleak pentsatu dezakeela kronika hau ez dela serioski idatzia izan. Irundarrekin elkartasuna Igandeko probak batera egin zirenez, ez zegoen modurik jakiteko zeinek irabazi zuen eta, ginkana bukatuta, lurrean eseri ziren kirolariak, sailkapenaren zain. Bitartean, Emery eta Ormabera beren duologoarekin jarraitu zuten, baina hortik aurrera izan zen lehen aldia beraiek esandakoa norbaitek aditzen zuela, ordura arte kasurik ez. Askok ez zekiten hitz egiten ari zirenak nortzuk ziren: “Nondik atera dira horiek?”, entzun zitzaion bati. Bi hizlariek ondo azaldu bezala, bi bekario kontratatu zituzten sailkapena egiteko. Aldundia udalerrietan lanpostuak sustatzeko sorturiko diru laguntzarekin kontratatu dituzte —azkenean bi OTA zaindari gutxiago izango dira—. Eskatutako egiteko baldintzak betetzen zituzten bi langileek: Lanbiden izena emanda, euskara maila ona, guapoak… baina letretakoak ziren biak eta horrek atzerapena ekarri zuen. Edonola ere, bost hilabeterako kontratatu dituzte eta oraindik garaiz dabiltza. Igandeko sailkapena egiteko astia izan zuten eta bi jardunaldietako batuketa baino ez zaie egitea falta. Pentsatzen da sailkapen bateratua iraileko Bikingo Marearen aurretik emateko moduan izango direla. Sailkapena prestatzen ari zirela Hondarribiko Herri Olinpiadetako parte hartzaileek elkartasun garrasia bidali zioten Irungo gazteriari —eta gazte sentitzen den orori—. Jakingo duzuenez, Irungo udalak sanmartzialetako txosnak eta kontzertuak Ficobara eraman nahi ditu, “porque sí”, eta horren aurka altxatu dira Moskuko tabernari, merkatari, auzotar eta hiri osoko denetariko eragile eta herritarrak. Alkatearekin hainbat bilera egin dituzte eta Santanok eskaera bakarra onartu die, Moskuko ekitaldiak Hondarribiko San Pedro kalean egitea, baina Hondarribiko udalak ez omen du onartu eta Urdanibiako tabernari eta txosneroen arabera dena ez da Madalen plazan kabituko, eta Urdanibian geratu nahi dute. Horregatik, haien arazoarekiko elkartasuna erakutsi zitzaien bideo formatuan eta Jaiak Herrian, Ez Ficoban Facebook taldean ikus daiteke (eta testuaren azpian). Hori da igandean gertatu zen guztia, eta horrela kontatu dizuegu. A, bai, Josu Belea Makil Idorrean taldeak irabazi zuen, baina hori gutxienekoa da.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.