La Bacaladerak garaipena behar du
Eskubaloiko Euskal Ligan jokatzen duen La Bacaladera Hondarribia taldeak ezinbestekoa du larunbatean garaipena lortzea, Espainiako Lehen Mailara igotzeko promozioa jokatzeko aukera ematen duen bigarren postua lortu nahi badu. Ereintzaren kontra etxean jokatuko du La Bacaladerak, Hondartza kiroldegian, larunbatean 20:00etan (eta ez igandean, ohi bezala).
Joan den asteburuan Gure Auzuneren kontra 35-32 galdu eta gero, Ereintzaren aurka nahi eta ez irabazi behar dute hondarribiarrek, zaila izango baita Amenabarrek berriro huts egitea. Zarauztarrek El Pilarrekin berdindu zuten eta ez zuten Hondarribiak emandako aukera aprobetxatu.
Liga amaitzeko hiru partida geratzen direnean dagoeneko txapela jantzi du Usurbilek, eta igoera faserako sailkatuko den beste taldearen izena falta da. La Bacaladerak eta Amenabarrek 30na puntu dituzte eta Urdulizek 29. Gainontzeko taldeek ja ez dute aukerarik. Printzipioz La Bacaladerak du egutegi errazena, eta beste bi taldeekin average-a alde du, baina helburua ziurtatzeko modu bakarra, geratzen diren hiru partidak irabaztea izango da, larunbatekotik hasita.
Ereintza hamaikagarren postuan dago eta dagoeneko ez du ezer jokoan, baina errenteriarrak bigarren itzuli txukuna egiten ari dira eta Hondartzan ezustekoa eman nahiko dute.
