Irungo Ernai: "Urdanibia zein bere ingurua heriotzera eraman nahi dute"
Irungo Ernairen ustez, Urdanibiako jai eremua Ficobara eramateko aukeraren gaiarekin, udal gobernuaren nahi hori “aspaldikoa” da, eta horren atzean interes ekonomikoak eta gizarte gaietakoak daudela. Ekonomikoak, Ernairen esanetan, “Ficoba dirua xurgatzen duen zulo bat” delako, “eta edozer egin behar dutelako zulo hori geroz eta handiagoa izan ez dadin”. Soziala, Urdanibia zein bere ingurua “heriotzera” eraman nahi dutelako Ernairen ustez.
Ernaik ziurtatu du jai eremuaren aldaketaren erabakia hartuta dagoela, eta hori Jose Antonio Santanoren gobernu taldearen jarreran araberakoa izan dela, “parte hartzea Santanoren ahotik askotan entzun dugun zerbait da, praktikara inoiz iristen dena”.
Astelehenean bilera egingo dute Urdanibiako ostalari eta merkatariek udalarekin. Horiei babes osoa agertu die Ernaik, eta udalari esan diote bilera horretara “entzutera” joan dadila, “eta arazoa konpon dezala konpon daitekeen modu bakarrean, hau da, herritarren iritzia entzun eta jaigunea herrian manten dezala”.
Jaiak antolatzeko ereduaz ere gogoeta egin du Ernaik. Uste du jaiak Ficobara eramatea seinale dela jaiak ez dituela herriak antolatzen, “momentuko udalaren esku gelditzen da herriko jai nagusien kudeaketa guztia. Guk jaiak herritik herriarentzat egin behar direla uste dugu, eta jaigunea Ficobara eraman edo ez, guk jaiak herrian ospatuko ditugu”.
Irungo gazteriari dei egin diote jaigunea herrian mantentzeko egiten ari diren ekintzetan parte hartzeko.
