Talaia lasterketak Donostia eta Hondarribia batuko ditu igandean
Uliatik eta Jaizkibeldik barrena, Pasaiako badia eta Lezoko eremua zeharkatuz, igandean Donostia-Hondarribia-Talaia mendiko probak herrialdeko hiriburua eta Hondarribia batuko ditu. 31 kilometroko lasterketan 500 lagunek parte hartuko dute —berehala agortu ziren dortsalak—, eta 09:30ean aterako da Donostiako Katalunia plazatik, eta Harresilanda kalean jarriko dute helmuga. Parte hartzaile horietarik 32 emakumeak dira. Fortuna Kirol Taldeak antolatzen du erreferentzia bihurtu den mendi lasterketa, aurten laugarren edizioa du.
Atzo egin zuten probaren aurkezpena Hondarribiko udaletxean. Bertan izan zen Txomin Sagarzazu Hondarribiko Udaleko Kirol zinegotzia. Haren arabera, gogoko du udalak lasterketa, kirol zaletasuna bultzatzen duelako, eta Hondarribiko ondare naturala balioan jartzen duelako, “ahal den gauza guztietan laguntzen saiatzen gara, helmugan, trafikoan, Hondartza kiroldegiko zerbitzuak errazten.
Ainara Murua kirolaria ere izan zen aurkezpenean. Iaz parte hartu zuen lehen aldiz proba horretan, eta ibilbidearekin maiteminduta gelditu zen, “askotan kanpora joaten gara horrelako bideen bila, baina ez gara ohartzen etxean bertan baditugula. Lasterketa gogorra da, exijentea, baina ikaragarri polita, eta gainera ongi antolatua.
Fortuna Kirol Taldeko Arantza Rojok ere hartu zuen hitza atzoko aurkezpenean. Hark nabarmendu zuen lasterketarekin bilatu dutena izan dela ahalik eta emakume gehienen parte hartzea, eta ingurumena errespetatzea, eta horretarako neurriak ezarri dituztela. Fortunaren webgunean daude probaren gaineko xehetasun teknikoak.
