Mariñoko neskek 2. Mailara igo nahi dute berandu baino lehen
Emakumeen Euskal Ligan jokatzen duen Mariño Irungo taldeak Espainiako 2. Mailara igotzeko aurrera pausua eman nahi du asteburuan, Hernanin irabazita. Jokoan 15 puntu geratzen direnean Mariñok 8 puntu ateratzen dizkio Gasteizko Neskak taldeari, eta euren arteko average-a alde dute irundarrek. Lehehengo tokian bukatzen duen taldeak soilik lortuko du igoera, kanporaketarik jokatu gabe.
Jardunaldia bukatuta 12 puntu geratuko lirateke liga amaitzeko eta Mariñok irabaziko balu 8 puntuko tarte horri eutsiko lioke, edo handitu, gasteiztarrek Beasainen hiru puntuak ez badituzte lortzen. Igoera ez lortzeko, geratzen diren partida guztiak galdu beharko lituzke Mariñok, eta Gasteizko taldeak edo hirugarren tokian dagoen Eibarrek denak irabazi. Ez dirudi oso erraza denik hori, orain arte bi partidetan baino ez baitu Irungo taldeak porrota ezagutu.
Mariñok gaur jokatuko du (larunbata), 18:30ean Hernaniko Zubipen. Gasteizko Neskek zer egiten duten jakiteko bihar arte itxaron behar da; 15:30ean hasiko da Beasaingo partida, Igartzan.
