2013an, Ficoban, bisitari, azoka eta salmenta gehiago
2012arekin alderatuz, datu itxaropentsuak utzi zituen 2013an Irungo Ficoba erakustazokak. Bisitarien kopuruak %21 egin zuen gora iaz 138.102etara iritsiz (inoizko altuena da); azokak 17ra igo dira, 2012ko 12en aldean; eta salmentak %12 hazi dira (gastuak ere %10 murriztu dira). Horren ondorioz, Ficobak 8 milioi euroko eragin induzitua utzi du Irunen eta inguruetan.
Iazko datuen berri emateko agerraldia egin dute gaur goizean Ficoban. Iaz egin ziren 217 jardueren gehiena, %57, bilerak izan ziren, %32 era askotako jardunaldiak, eta %8 azokak. Okupazio datuak, ostera, ez dira 2012koak izan, iaz 212 egunetan egon zelako erakustazoka, 2012ko 232n aldean. Horren arrazoia da iaz tamaina handiko ekitaldi gehiago antolatu zirela duela bi urte baino.
Eta aurrera begira ere jarri dira Ficoban. Eta aurrerako horretan, pabilioietan kontzertuak egiteko aukera nabarmendu dute. Horrela, Ficobatik aurreratu dute Pitbull abeslariak kontzertua emango duela uztailaren 19an. Azoka profesionalak antolatzeko bidea ere jorratuko dute erakustazokan. Eta nabarmendu dute bertako parkina doan dela duela zenbait astetik, edonork erabiltzeko prest.
