Garitano lehen eskutik jasotzen ari da lezoarren kezka eta proiektuak

admin

Bidasoa

2014/02/20

Garitano eta Zabalo aldundiko eta udaleko beste ordezkariekin

Martin Garitano Ahaldun Nagusia Lezon da herritarren kezka eta proiektuak lehen eskutik jasotzeko. 12:00etan egin diote harrera udaletxean Ainhoa Zabalo alkateak eta aukera izan du udal ordezkari zein langileekin biltzeko. Igerilekura jo dute ondoren, bertako sapaian dagoen arazoa bertatik bertara ezagutzera. Gaintxurizketako bizilagunekin biltzeko ere baliatu du bisita Garitanok eta besteak beste toporako sarbidea egoera txarrean dagoela jakinarazi diote diputatu nagusiari. Kezka hori dagoeneko bideratu dutela Errepidetako Zuzendaritzara eta bilera egingo dutela gaur bertan gaiaz hitz egiteko azaldu du Garitanok. Azken bi urte eta erdian Gipuzkoako beste herrietara egiten ari diren egun beteko bisiten barruan kokatzen da Lezokoa, Herritarrekin herrira egitasmoaren barruan hain zuzen ere. Helburua herrien arazo zehatzak ezagutzea eta herritarren kezka eta proposamenak zuzenean jasotzea dela nabarmendu du: “Guretzat oso garrantzitsua da herrietako errealitatea bertatik ezagutzea eta zuzenean entzutea, ez bakarrik txaloak, baita arazoak ere eta bertatik erantzutea kezka horiei”. Arratsaldean batzarra Horren harira, 19:00etan batzar irekia deitu dute herritarrekin, “herritarrak entzun, kezkak jaso eta ahal den neurrian erantzun edo guxtienez gure beste zuzendaritzetara bideratzea da bileraren xedea” azaldu du Garitanok. Batzarra aurretik 16:45ean Bonantza auzo elkarteko ordezkariekin bilduko da diputatu nagusia termikaren parean. Auzo elkarte horrek behin baino gehiagotan salatu izan du eremu horrek duen arriskua eta baita irtenbideak eskatu ere. Gaurko Garitanoren bisita eskaera zuzenean egiteko baliatuko du auzo elkarteak. Lau lerrotan zentratu direla goiz partean azaldu du Ainhoa Zabalo alkateak. Euskara, parte hartzea, berdintasuna eta herri jasangarriaren gainean egiten ari diren lana aurkeztu diotela Garitanori esan du. Igerilekutik herri sarrerako errotondora jo dute ahaldun nagusia eta diputaziotik joandako ordezkariek, “herritarrek behin baino gehiagotan azaldu dutelako puntu horrekiko kezka”. Iturrin poligonoa, edo Plazeta futbol zelaia ere bisitatuko dituzte egunean zehar. Lehenengoan hainbat proiektu daudela baina udalak ez duela informazio instituzionalik azaldu du Zabalok, eta egindako ibilbidea azaldu nahi diete bertako enpresa, langile eta herritarrei. Futbol zelaiko lanak berriz, besteak beste foriu aldundiaren diru laguntzari esker egin izan ahal dituztela azaldu du Lezoko alkateak, “eta hura erakutsi nahi diegu orain”. Garitanoren eta foru aldundiko beste kideen bisita eskertu du Zabalok amaitzeko: “Oso pozik gaude gure herriko proiektuak eta lezoarren kezkak zuzenean entzutera eta ezagutzera etorri izanagatik”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.

Garitano lehen eskutik jasotzen ari da lezoarren kezka eta proiektuak

Gipuzkoa

Hernani eta Irun lotzen dituen Renfeko tren zerbitzua etengo dute uztailaren 25etik irailaren 6ra

Bergarako eta Zarauzko autoen ikuskapen zentroetan greba mugagabeari eutsiko diote

Beasaingo Urkiola jatetxeak irabazi du Jakitea elkartearen Juan Manuel Garmendia gastronomia saria

Torreko Hodia ikusgai jarriko dute Ekainberrin, duela 12.000 urte grabatutako pieza bat

Deeptek-Gipuzkoa fundazioak programa bat abiarazi du enpresa zientifikoei laguntzeko

Ertzaintzak Donostiako Karmengo jaietan «herritarren aurka erabilitako indarkeria» salatu du EH Bilduk

Donostiako Karmengo jaietan jasandako «jazarpen poliziala» salatu du besta batzordeak

Abuztuaren 11tik 14ra jokatuko dute Donostia Hiria torneoa

Burujabetza eske elkartu dira 180 alkate inguru Bergaran

Ahotsak eta omenaldiak ardatz Donostiako Jazzaldian