Olinpiadak berreskuratuko ditu Hondarribiko Gazte Asanbladak

admin

Bidasoa

2014/01/29

Olinpiadetako argazkiak eta bideoak digitalizatzen ari da gazte asanblada

Hondarribiko Gazte Asanblada (HGA) herriko olinpiadak antolatzen hasiko da heldu den neguan eta deialdia egin die horretan lagundu nahi duten guztiei. Garai batean egiten ziren olinpiadetatik hartu dute ideia eta “orduko aniztasuna” nahi dute lortu. Otsailaren 8an (larunbata) dena antolatzen hasteko bilera egingo dute Zuloaga Etxean, 16:30ean. Bileraren aurretik argi daukaten gauza bakarra da neguan egin nahi dutela, “jaiak eta gero herrian ez dagoelako ezer”. HGAko kideak garai batean egiten ziren olinpiaden gaineko dokumentala grabatzen ari dira eta horretarako hainbat elkarrizketa egin dituzte, eta argazkiak eta VHS grabazioak digitalizatzen ari dira. “Dokumentalarekin, olinpiadak ezagutu ez dituztenen irrika piztea nahi dugu —kontatzen du Jon Alkainek—. Parodia zegoenean 2.000 lagun elkartzen ziren Jostaldin ikusteko eta ordu batzuk lehenago joaten ziren lekua hartzera”. Gipuzkoako beste herri batzuetan ere egin ziren halako ekintzak, baina inongoek ez zuten Hondarribiko olinpiaden arrakasta lortu. Herriko gazte koadrila guztiek hartzen zuten parte eta hainbat motako probak antolatzen zituzten: kirola, abilezia, kultura, bertsolaritza, parodia… Beste herrietatik ere etortzen zen jendea koadrilen arteko probak ikustera. “Herri mailako ekintzak ziren, denek laguntzen zuten, DYAk, Kofradiak, brigadak…”, azaldu du Xabi Bengoetxeak. Dokumentazio lana bukatzen dutenean bildutakoa Udal Artxibategiaren esku utziko dutela argitu du Bengoetxeak eta, horregatik, herritarrei haien grabazioak eskatu dizkiete. “Batez ere parodiaren bideoak eskuratu ditugu, baina badakigu badagoela bideo bat urte bateko olinpiadaren laburpena jasotzen duena. Bideo hori eskuratu nahiko genuke”, gehitu du Alkainek. Izan ere, xumetik hasi nahi duten arren, ahalik eta hoberen egitea nahi dute eta, hori horrela, garai bateko olinpiadak nola antolatzen ziren ezagutu nahi dute, antolatzaileekin hitz eginez eta ahalik eta material gehiena bilduz. [box]

Olinpiadak antolatzeko lehen bilera

Eguna: Otsailak 8, larunbata.
Lekua: Zuloaga Etxea.
Ordua: 16:30.

[/box]

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.