Euskaldun berriaren balada
Barakaldokoa naiz eta daukat paro obrero, horregatik euskaltegira noa ni egunero. Errealitateak mila, ikasleak adina. Egunero-egunero AEKn ikasten duten herritarrak ikusten ditut ikasgeletan sartzen eta ikasgeletatik ateratzen. Batzuetan gozatu egiten dut, baina besteetan sufritu ere bai! Zenbat galdera, zenbat zalantza.
Goizero goizero AEKn bezero, batzuetan ero, besteetan bero. Baina ez dut milagro handirik espero! Hauxe izaten da zenbait ikasleren jarrera, aldakorra. Batzuetan eskoletara gogotsu sartu, baina burumakur ateratzen dira. Baina beste batzuetan irribarretsu ateratzen dira, euren buruarekin harro. Nekatuta etortzen dira asko, eguna lanean pasata, etxera joatean egin behar duten guztia buruan dutela. Baina etorri egiten dira.
Egun askotan pentsatzen dut hau dela inutila, nik ez daukat kulparik ez banaiz abila. Hau da hau makila, aditz klase pila, hitzak beste mila, «animo mutila» esaten dute baina ez da hain fazila. Eta arrazoi dute, ez da hain fazila. Baina inork ez zuen esan hala zenik. Askotan, ikasleek egiten dituzten galderek grazia egiten didate. Arrazoiaren arrazoia jakin nahi dute. Mila galdera egiten dituzte; irakasle askori sekula bururatu gabeko galderak! Hizkuntzaren zirrikituetan galtzen dira, pixkanaka aurrera urratsak eginez.
Ideia hau nire buruan ez dakit noiz hasi zen, baina batzuetan ez naiz hemen gehiegi dibertitzen. Lau gauzak izen bat dute eta gauza batek lau izen. Kokoteraino nago klaseak aditzen, pegatak ipintzen eta dirua biltzen. Eta hau ere egia. Eta ikasleei aitortu beharrekoa. AEK ez da euskaltegi hutsa, eta ez da hizkuntza bakarrik irakasten. Harreman mota berriak egiten dituzte ikasleek, euskaraz. Eta bertsoak entzuten dituzte eta euskal filmak ikusi. Eta taloak egin.
Nola sartu nintzen ez dut konprenitzen, lan on bat bilatzeko ez badu serbitzen! Eta honetan ere arrazoi, tamalez. Baina geroz eta jende gehiagok ikasi eta erabili, orduan eta behar handiagoa sentituko dute ez dakitenek. Hortaz, jarrai dezagun lanean, goizero goizero AEKn bezero. Batzuetan gogotsu, bestetan nekatuta. Batzuetan asmatuz eta besteetan okerrak eginez. Miraririk espero gabe, lanean, urratsak eginez. Euskaldun berriaren komeriak, balada gozo bilakatu arte.
