Energia burujabetzari buruzko jardunaldiak izango dira Errenteria-Oreretan
Energia burujabetza, kontsumotik eredu aldaketara izeneko jardunaldiak egingo dituzte, hurrengo asteazken eta ostegunean, hilak 22 eta 23, 19:00etan, Xenpelar Etxean. Jardunaldi horiek Goiener energia alternatiboen arloan lan egiten duen kooperatibaren Errenteria-Oreretako taldeak antolatu ditu.
Asteazkenean, Energia: nola aurreztu, nola ekoiztu hitzaldia emango dute Fernando Bengoetxea (Ekain Taldea) eta Rafa Irastorzak (Uhin). Ondoren, Oligopoly 2 dokumentala proiektatuko dute.
Hurrengo egunean, Goiener zer den eta zertan lan egiten duen azalduko dute. Antolatzaileek aurreratu dutenez, herritarrek energia berriztagarriak kontsumitzeko antolatu dira. Hitzaldia Santiago Ochoa de Eribe kooperatibako zuzendariak emango du.
Energia burujabetza, energia aurrezpena eta energia berriztagarrien arloan lan egiten du Goienerrek, eta Errenteria-Oreretan bazkide eta erlazio sarea zabaltzeko asmoa du: “Bidea egiten hasteko ezinbestekoa da gaiaren inguruko sentsibilizazioa eta formazioa, herriko eragileak ezagutzeaz gain”.
