Gure esku dago
Ez dakit nola irudikatuko zuen herri honen geroa historian barrena «Gora Euskadi edo Euskal Herria askatuta» oihukatu duen herritar bakoitzak. Ez dakit Euskadiz aritu direnak Euskal Herriaz ari ote ziren (ote diren). Ez dakit «askatuta» ziotenean gauza beraz ari ote ziren (ote diren)… Eta… ez dakit historian barrena «Gora Euskadi edo Euskal Herria askatuta» oihukatu duten herritarrek nola irudikatuko zuten askatasun horren etorrera; askatasuna lortzeko eguna, modua, ospakizuna…
Berriki, 36ko gerran anti-aereo bat eskuartean zuen Saseta batailoiko gudari baten argazkia ikusi eta Twitter-en jarria dut. Egunotan egunkarietako argazkietan ikusi ditugu, espetxetik irteten, Parot izeneko doktrinaren zigor-erantsi eta bidegabea pairatu behar izan duten presoak. Nola irudikatzen ote zuten argazki horietako pertsonek herri honen egunik askeena?
Zenbaitetan, urrunekoak amets eta fantasia kutsua har lezakeela irudituta, hortik artikulu honen sarrera, galderaz eta argazkiz betea.
Gatozen errealitatera. Anti-aereo, indarkeria eta gisakorik gabeko aro honetan, bizi-bizi segitzen du geure etorkizuna erabakitzeko eskaerak. Gure Esku Dago herri ekimenak horretan dihardu. Datorren urteko ekainaren 8rako deitu ditu herritarrak. Helburua, herritarrek, elkarri eskua emanda, Iruñetik Durangora 123 kilometroko giza katea osatzea da. Berrogeita hamar mila herritar beharko dira helburua betetzeko; gutako bakoitza kate-maila bihurtzea, Euskal Herriak bere etorkizuna erabakitzeko eskubidea duela aldarrikatzeko.
Datorren urtea, gainera, esanahi bereziko urtea izango da bide horretan. Eskozian irailaren 18an egingo dute independentziari buruzko herri bozketa. Erresuma Batutik banandu nahi duten ala ez erabakitzeko aukera izango dute herritarrek, gaur-gaurkoz zail izango duen arren independentziaren aldeko botoak nagusi izatea. Garrantzitsuena bozketa egitea bera da, eta Erresuma Batuak bide horri oztoporik jarri ez izana. Azken finean, orain ezin dena, bihar posible izan liteke. Izango da.
Eta… Eskoziarekin batera, gauzak ondo, Katalunian datorren urtean egingo dute beren etorkizuna erabakitzeko erreferenduma, ANC Biltzar Nazional Katalanak akuilu lan ikaragarria egin ondoren. 1989an Estoniak, Letoniak eta Lituaniak Sobiet Batasunetik alde egiteko antolatutako ekimena eredutzat hartuta, aurtengo irailaren 11an, 1.600.000 herritar elkartu zituen ANCren deiak, argazki eta mezu historikoak plazaratzeko. Elkarri eskua emanda, Kataluniako lau herrialdeetan, 400 kilometroko ibilbidea osatu zuten. Generalitateak eman zuen datua. Biltzar Nazional Katalanak milaka eta milaka herritar aipatu zituen.
Ukaezina da Katalunian inflexio puntua sortu duela irailaren 11ko herri mobilizazioak. Generalitatearen Iritzi Ikerkuntzarako Zentroak egindako inkestaren arabera, ERCk irabaziko lituzke orain hauteskundeak (%20,8), CIUren aurretik (17,1). CIUk hiru puntu galduko lituzke. Aipagarria, baita ere, CIUtik ihes egindako botoaren %21,5
ERCra joango litzatekeela. Ondorioa: independentziaren aldeko jarrera indartzen ari da Catalunyan, duda-mudan dauden herritarren %17,8a ahaztu gabe. Nabarmenak PPCren galera (%8,7tik %2,8ra) eta PSCrena (%9,69tik %6ra).
Inkestetako zenbaki hotzetatik haratago, Katalunian agerian geratu da gizarte zibila izan dela prozesuko protagonista. Ez alderdi politikoak. Alderdiek herritarren esanera egokitu behar izan dute, eta mezua ondo ulertu du Artur Mas presidenteak. Tinko eusten dio erabakitzearen aldeko jarrerari.
Auzokoak ikusita, gurean zer? Ba… beste horrenbeste. Gure Esku Dago herri ekimenak 132 kilometroko giza katea osatzeko deia egin du datorren ekainaren 8rako, desberdintasunen gainetik, etorkizunean zer izan nahi dugun erabakitzeko. Inork ez digu deus emango. Geuk hartu behar dugu geurea: geure etorkizuna.
