Asiako liztorren kontra jarritako tranpak kentzeko eskatu du aldundiak
Oiartzunen zenbait tranpa jarri zituzten Asiako liztorren kontra, auzolanean, eta orain, ekosisteman mesede baino kalte gehiago egiten dutelakoan, Gipuzkoako Foru Aldundiak horiek kentzeko eskaera egin du. Aldundiak ondorioztatu du polinizatze lanak egiten dituzten espezieak ere tranpa horietan erortzen direla.
Aldundiak du espezie inbaditzaileen eskuduntza, eta zentzu horretan, baita Asiako liztorrena ere.
Oiartzunen, hemezortzi tranpa daude Karrikan, Elizalden, Ergoienen eta Iturriotzen. Tranpa horietan 159 Asiako liztor erori dira, eta bertako 26 liztor eta 273 polinizatzaile. Herritarren ekimenetik jarriak izan dira, baina aldundiak onartu die borondate onarekin egin den ekimena izan dela.
Era berean, orduan tranpak jartzen lagundu zuten guztiei orain kentzen ere laguntzeko eskatu die Oiartzungo Udalak, beraiek direlako tranpak non dauden hobekien dakitenak.
Bestalde, Asiako liztorren habirik ikusiz gero, aldundiari eman behar zaiola horren berri azaldu du udalak, eurak direlako protokoloa martxan jarriko dutenak. Irailerako espero dute liztor mota horien mugimendua handitzea.
