Euskara eta Ezinduen egunak gogoan izan ditu PSE-EEk
Abenduaren 3a bi egun ospatzen dira: Euskararen Eguna batetik, eta Ezinduen Eguna, bestetik. Errenteriako PSE-EEk biak gogoan izan dute. Euskararen Egunaren harira, “luzea izango den bidea egiten jarraitu” behar dela adierazi du PSE-EEk. Ha...
Abenduaren 3a bi egun ospatzen dira: Euskararen Eguna batetik, eta Ezinduen Eguna, bestetik. Errenteriako PSE-EEk biak gogoan izan dute.
Euskararen Egunaren harira, “luzea izango den bidea egiten jarraitu” behar dela adierazi du PSE-EEk. Hala ere, kalitatean hobetu dela iritzi dio, eta horren adibide dela “gure mugetatik kanpo” jasotako aitortza: “Bideak ireki dira, komunikazio kanaletan euskara sartuz joan da, eta guzti horrek ikusgarritasuna, hazteko gaitasuna eta hiztun komunitate bezala jaiotzea” ekarri duela esan du.
Horrez gain, gogoan izan ditu euskara ikasi duten edo ari direnak, baita eredu elebidunetan seme-alabak eskolaratu dituztenak, eta baita ama hizkuntza euskara duten guztiak, erabiltzen jarraitzeagatik.
“Krisiak gehiago eragin die ezinduei”
Ezinduei dagokionez, krisiak eurei eta euren familiei gehiago eragin diela iritzi dio PSE-EEk, eta Raxoiren gobernuak Mendekotasun Legean egindako murrizketak salatu ditu. Zentzu horretan, erakunde publikoei ezinduen eskubideak babesteko eta bizi kalitatea hobetzeko “ahalegina” egiteko eskatu die.
PSE-EEren arabera, PPren gobernuak %30 murriztu ditu mendekotasunera bideratutako funtsak, zaintzaileentzako diru laguntzak %15 gutxitu, eta %85eraino ere iritsi daitekeela adierazi du lurraldeak hala nahiko balu. Bestetik, senitarteko ez profesionalek gobernuak finantzatutako Gizarte Segurantzako kotizazioak galdu dituztela gogorarazi du, baita ezinduen enplegurako politika aktiboetarako bitartekoak ere.
PSE-EEk aukera berdintasuna eta gizarte batasunaren alde egingo duela esan du.
