Gaur hasiko dira Txotxongilo Egunetako emanaldi irekiak, Mendi Zolanen
Akelarre Euskal Kultur Elkarteak antolatuta, astelehenean hasi ziren Hendaiako Txotxongilo Egunak. Igandera arte, hainbat ikuskizun taularatuko dituzte, euskaraz. Gainera, eskuekin itzal antzerkia egiteko ikastaro bat eskainiko dute. Atzo eta astelehen...
Akelarre Euskal Kultur Elkarteak antolatuta, astelehenean hasi ziren Hendaiako Txotxongilo Egunak. Igandera arte, hainbat ikuskizun taularatuko dituzte, euskaraz. Gainera, eskuekin itzal antzerkia egiteko ikastaro bat eskainiko dute.
Atzo eta astelehenean Rosa Martinezen taldeak Beti lagun lana antzeztu zuten, herriko ikastetxeetako bi eta bost urte arteko ikasleentzat. Obrari esker, itsasoa eta mendia Internetez harago existitzen direla irakatsi zieten hendaiar txikiei.
Baina publikoari irekitako ekitaldiak gaur hasiko dira, 15:00etan, Mendi Zolan kulturgunean. Troupe zurrunka taldeak Erraldoi bihotz gabea lana taularatuko du; bihotzaren ordez liztor kabia duen erraldoi baten istorioa da. Bihar Goloka konpainiaren Wolingen garatxoa obra ikusi ahalko dute sei eta hamar urte arteko ikasleek eta etzi En la lona taldeak Sialuk hartz txikiaren bidaia taularatuko du, 20:30ean.
Obrez gain, larunbat goizean itzal txotxongiloak egiteko ikastaroa egingo dute. Hiru orduko saioa izango da, Valeria Gugliettik zuzendutakoa. Teknika horretan aditua da Guglietti, eta, besteak beste, Mexikon eta Taiwanen aritu da. Sortzaile horren Eskuz esku lana ikusteko aukera egongo da, 16:00etan.
Jaialdia igandean amaituko da, Katillukadak antzezlanarekin, 11:00etan. Bertsoa eta txotxongiloak nahasten ditu Kontakatillu taldeak obra horretan.
