Agifesek zentroa ireki du Buenavistan, buruko gaixoak gizarteratzeko
Agifesek, buru gaixotasuna duten pertsona eta senideen elkarteak, zentro berria ireki du Buenavistan. Egoitza berri hori Gipuzkoan zabaltzen duen bederatzigarrena da. Egoitza berri horrek hogei erabiltzaile inguru jasoko ditu egunero, helburu argiarekin: buruko gaixotasuna duten pertsonen errehabilitazio psikosoziala. Horrela, gaixotasunaren ondorioz galdutako gaitasunak berreskuratzeko espazioa eskaintzen du. “Bizitza normalizatua eramateko aukera izatea da helburua”, esan zuen herenegun Nerea Amunarriz zentroko arduradunak. Buenavistako zentroak 350 metro koadro ditu, erabilera anitzeko hiru aretotan banatuta. Zentro berria irekitzeko jasotako laguntza eskertu zien Agifesen presidenteorde Jose Mari Irazustak, hala nola Kutxari, Gipuzkoako Foru Aldundiari eta Donostiako Udalari. Gogorarazi zuenez, ekainera arte Loiolako zentrora joan behar zuten Donostiako erabiltzaileek: “Lokal hori zaharkituta zegoen, eta ez zituen errehabilitaziorako baldintzak betetzen”. Donostiarrez gain, Oarsoaldeko erabiltzaileak ere jasoko ditu Buenavistako egoitzak. Autonomia eta erabakimena Irazustak gaineratu zuenez, elkarteko langileen betebeharra “buruko gaixotasuna duten pertsonei protagonismo handiagoa ematea” da, euren “autonomia eta erabakimena indartzeko”. Jakinarazi zuenez, “Gipuzkoan asko dira buruko gaixotasunen bat duen kide bat duten familiak. Osasun mentaleko 5.000 kasu berri gehiago daude urtero”. Iaz, Euskal Autonomia Erkidego osoan 80.000 laguni eman zitzaion arreta, Osakidetzaren txosten baten arabera. Hori bai, Agifeseko presidenteordeak esan zuen “kontziente” direla laguntza eskatzera ausartzen ez diren pertsona asko daudela. Ildo beretik mintzatu [...]
Agifesek, buru gaixotasuna duten pertsona eta senideen elkarteak, zentro berria ireki du Buenavistan. Egoitza berri hori Gipuzkoan zabaltzen duen bederatzigarrena da.
Egoitza berri horrek hogei erabiltzaile inguru jasoko ditu egunero, helburu argiarekin: buruko gaixotasuna duten pertsonen errehabilitazio psikosoziala. Horrela, gaixotasunaren ondorioz galdutako gaitasunak berreskuratzeko espazioa eskaintzen du. “Bizitza normalizatua eramateko aukera izatea da helburua”, esan zuen herenegun Nerea Amunarriz zentroko arduradunak.
Buenavistako zentroak 350 metro koadro ditu, erabilera anitzeko hiru aretotan banatuta. Zentro berria irekitzeko jasotako laguntza eskertu zien Agifesen presidenteorde Jose Mari Irazustak, hala nola Kutxari, Gipuzkoako Foru Aldundiari eta Donostiako Udalari. Gogorarazi zuenez, ekainera arte Loiolako zentrora joan behar zuten Donostiako erabiltzaileek: “Lokal hori zaharkituta zegoen, eta ez zituen errehabilitaziorako baldintzak betetzen”. Donostiarrez gain, Oarsoaldeko erabiltzaileak ere jasoko ditu Buenavistako egoitzak.
Autonomia eta erabakimena
Irazustak gaineratu zuenez, elkarteko langileen betebeharra “buruko gaixotasuna duten pertsonei protagonismo handiagoa ematea” da, euren “autonomia eta erabakimena indartzeko”.
Jakinarazi zuenez, “Gipuzkoan asko dira buruko gaixotasunen bat duen kide bat duten familiak. Osasun mentaleko 5.000 kasu berri gehiago daude urtero”. Iaz, Euskal Autonomia Erkidego osoan 80.000 laguni eman zitzaion arreta, Osakidetzaren txosten baten arabera. Hori bai, Agifeseko presidenteordeak esan zuen “kontziente” direla laguntza eskatzera ausartzen ez diren pertsona asko daudela. Ildo beretik mintzatu zen Amunarriz, eta buru gaixotasunen “gizarte estigma zama oso handikoa” dela iritzi dio. Hala ere, esan zuen Agifes “mito eta aurreiritziei” aurre egiteko “esfortzua” egiten ari dela.
Funtzionamendua
Zentroaren erabiltzaileek garapen kognitiboa zein emozionala lantzen dute. Janaria prestatzen ikasten dute, baita bakoitzaren garbitasuna mantentzen ere. Kirola ere egiten dute.
Horrez gain, hainbat erakunderekin (kultur etxeak edo liburutegiak, esaterako) hitzarmenak dituzte, jarduerak egiteko. Beste pertsona eta inguruekin harremanetan jartzea garrantzitsua da osaketarako, Amunarrizek argitu zuenez.
