Orokorrean, grebaren balorazio positiboa egin dute sindikatuetako eta eragile gehienetako ordezkariek. Atzo, industrialdeetan izan zuen jarraipen zabalena mobilizazioak, eta komertzioetan jarraipena txikiagoa izan zen.
Hala ere, argi dute lana dagoela egiteke, denak elkarrekin, ez norbera bere aldetik ibilita. Horrez gain, langabeek uste dute grebak jarraipena izan behar duela.
Pablo Garmendia (ELA): “Toki puntualetan aurreko greban baino txikiagoa izan da itxi dutenen kopurua”
“Guk espero genuena baieztatu da. Goiz-goizetik industrian geldialdia zabala izan da, eta arrakastatsua izan da. Eguna aurrera joan den neurrian, ikusi dugu irakaskuntzan ere greba arrakastatsua izan dela. Salbuespenak betiko tokiak izan dira, Irungo erdialdeko komertzioak; agian aurreko greban baino txikiagoa izan da itxi dutenen kopurua, baina toki puntualetan. Oro har, arrakastatsua eta oso positiboa izan da. Gainera, ez da istilurik egon, nahiz eta Ertzaintzaren posizioa goiz-goizetik nahiko bortitza izan da, besteetan baino gogorragoa”.
Zorion Ortigosa (LAB): “Hasierako zalantza, kezka eta beldur guztiak uxatu ditugu grebaren erantzunarekin”
“Hasierako zalantza, kezka eta beldur guztiak uxatu ditugu grebak izan duen erantzunarekin. Oarsoaldean sektoreka izan duen jarraipena berbera izan da, bakarrik garraio, hezkuntza eta bestelako gutxieneko zerbitzuek desitxuratu dute, igandeetan bezala funtzionatu baitute. Bidasoan, berriz, komertzioan ez du jarraipen handirik izan grebak, nahiz eta taberna eta denda batzuk bat egin duten. Industrian, berriz, pozik gaude izandako erantzunarekin, lantegi handienek itxi baitute. Bestalde, poliziaren presentzia handia izan da, eta piketeen lana oztopatu dute».
Kepa Olaiz (ESK): “Ikusi dugu bakarkako borroka ez dela bidea, eta denek batera egin behar dugula aurrera”
“Grebaren erantzuna erabatekoa izan da Oarsoaldean, eta Donostian, berriz, jendearen erantzuna oso garbia izan da. Piketeetan lana ere egokia izan da, ez baita aparteko gertaerarik izan. Eskualdean Tajo kooperatibaren jarrera penagarria aipatuko nuke. Elkartasuna, etika eta kooperatibismoa ordezkatu beharrean, ez die erantzun Madrilgo gobernuaren murrizketei. Oro har, ikusi dugu bakarkako borroka ez dela bidea, eta denek batera egin behar dugula aurrera. Eta nahi eta nahiezkoa dela Europako Banku Zentrala, Troika eta Merkelen presioen aurrean erantzutea”.
Rafa Lorente (Oarsoaldeko Langabeen Asanblada): “Jarraipen bat behar du honek; ezin da greba batean bakarrik geratu”
Hasiera bat da, baina ez da nahikoa, greba batekin bakarrik ez baita ezer lortuko. Hori bai, Euskal Herri osoa zoriondu nahi dut, batik bat, Donostian jende asko izan baita. Gazteak gehienbat kalera atera dira. Balorazioa positiboa da, baina jarraipen bat egon behar du, ezin da greba batean bakarrik geratu. Mobilizazioak egun batean bai eta bestean ere izan behar dira, jende hori lotsarazteko. Herrian, zehazki oraindik lo gaudela iruditzen zait. Langabeen Asanbladatik ikusi dugu orain arte ez duela jendeak erantzun, ez lanean daudenak, baizik eta langabezian daudenak. Elkarte guztiak elkartu eta baloratu beharko dugu”.
Orokorrean, grebaren balorazio positiboa egin dute sindikatuetako eta eragile gehienetako ordezkariek. Atzo, industrialdeetan izan zuen jarraipen zabalena mobilizazioak, eta komertzioetan jarraipena txikiagoa izan zen.
Hala ere, argi dute lana dagoela egiteke, denak elkarrekin, ez norbera bere aldetik ibilita. Horrez gain, langabeek uste dute grebak jarraipena izan behar duela.
