‘Parot doktrinaren’ aurka protesta egingo dute bihar
Gabriel Zabala Irungo presoari ezarritako 197/2006 legearen aurkako —Parot doktrina bezala ezagunagoa— jarrera erakusteko asmoarekin, mobilizazioak deitu ditu Irungo Herri Bilguneak, biharko. Hala, eguerdiko 12:30ean eta Urdanibia plazatik abiatuta...
Gabriel Zabala Irungo presoari ezarritako 197/2006 legearen aurkako —Parot doktrina bezala ezagunagoa— jarrera erakusteko asmoarekin, mobilizazioak deitu ditu Irungo Herri Bilguneak, biharko. Hala, eguerdiko 12:30ean eta Urdanibia plazatik abiatuta, giza katea egingo dute Irungo epaitegiraino. Ondoren, “bizi osorako kartzela zigorra bertan behera uztea irudikatuz”, ekitaldia egingo dute, eta azkenik, adierazpena irakurriko dute.
Horiek horrela, 197/2006 doktrina aurka egin nahi du mugimenduak. Bertatik adierazi dutenez, Estrasburgoko Giza Eskubideen Auzitegiak Parot doktrina “giza eskubideen aurkakotzat” jo duen arren, “Espainiak entzungor egin dio epaiari, eta beren zigorra aspaldi bete duten makina bat preso mantentzen ditu espetxean”.
Dinamika berri baten hasiera
Horiek horrela, Parot doktrinaren aplikazioa “berehala eteteko” aldarrikapena egingo du mugimenduak biharko deialdian. Hala, Irungo Udalak “presoei ezarritako hainbat salbuespen neurri bertan behera uzteko eskatzen zuen mozioa” onartu zuela gogora ekarri du bilguneak.
Mugimenduak jakinarazi duenez, “Irunen lanketa berezia” egingo dute, “197/2006 doktrina indargabetzeko eta Gabriel Zabala presoa askatzeko aldarriarekin bat egiteko”. Lanketa hori azaroan iritsiko da bukaerara, “mobilizazio jendetsu” baten bidez. Hori dela eta, biharkoak, “dinamika horri hasiera ematea” du helburu.
