‘Kaiku, horrela ez!’
Ana Konpañon eta Santi Angulo. Duela hilabete batzuk Oreretako Eroski supermerkatuko apaletan Euskal Herria esnea ikusi genuen eta huraxe probatzea erabaki genuen. Ona iruditu zitzaigunez, hainbat astetan esne hori kontsumitu genuen, bat-batean esne h...
Ana Konpañon eta Santi Angulo. Duela hilabete batzuk Oreretako Eroski supermerkatuko apaletan Euskal Herria esnea ikusi genuen eta huraxe probatzea erabaki genuen. Ona iruditu zitzaigunez, hainbat astetan esne hori kontsumitu genuen, bat-batean esne hori Eroskiko apaletatik desagertu zen arte. Zergatia galdetu genuenean gehiagotan ez zutela ekarriko erantzun ziguten.
Orain, Kaiku enpresak Euskal Herria esne markari salaketa jarri diola enteratu gara. Ez digute salaketaren motiboa azaldu, baina bai Eusko Jaurlaritzak euskara hutsez etiketatzeagatik isun handia jar diezaiokeela.
Jarrera lotsagarri eta hipokrita horiek salatu nahi ditugu: Kaikurena, interes komertzialengatik euskararen erabilerari kalte egingo dion salaketa jartzeagatik. Eroskirena, hemengoa dela esaten duena, baina hangoa saltzen diguna, gure herriko produktuen komertzializazioa oztopatzeagatik. Eta Eusko Jaurlaritzarena, hizkuntzen inposizioaren eta euskara ez erabiltzeagatik isunak jartzearen aurka azaltzen dena, baina gaztelania inposatzen duena, euskara hutsezko erabilerari isunak jarriz.
Zera ere eskatu nahi diogu Eusko Jaurlaritzari, salaketarekin aurrera ez jarraitzea eta euskara hutsez etiketatzeari mugarik ez jartzea; Eroskiri esne marka hori bere apaletan berriro jartzea; eta Kaiku enpresaren produktuei boikot aktiboa, salaketa eta horren ondorioak bertan behera geratu arte.
