Hilaren 26ko greba orokorrerako giroa berotu du ELAk
Krisiaren eta instituzioek hori kudeatzeko erabili duten jarreraren eraginez “herritar asko nahikoa erreta dauden arren”, hilaren 26ko greba orokorrera begira giroa oraindik eta gehiago berotzeko asmoarekin protesta egin zuen ostiralean ELA...
Krisiaren eta instituzioek hori kudeatzeko erabili duten jarreraren eraginez “herritar asko nahikoa erreta dauden arren”, hilaren 26ko greba orokorrera begira giroa oraindik eta gehiago berotzeko asmoarekin protesta egin zuen ostiralean ELAk.
Erdialdeko kaleetan barrena ibili ziren partaideak, Greba orokorra. Pobreziarik ez lelopean. Bidean murrizketen eta pobreziaren kontrako oihuak bota zituzten, eta batik bat banketxeak kritikatu zituzten. Era berean, greba orokorrerako deia egin zuten. Protesta Biteri kaleko Kutxabanken egoitzaren aurrean bukatu zuten.
Aurreko grebekin alderatuta, egoera egun “okerrago” dagoela iritzi dio Pablo Garmendia Oarso Bidasoko ELAko arduradunak: “Pobreziarantz eramango gaituzte, eta guk ezin dugu geldirik gelditu”.
Protesta horretan ere Eroski Sabecoko langile izan zirenekin edukitzen ari den jarrera kritikatzekoak ziren, Niessenetik pasatuz. Azkenean, ordea, aurrerago mobilizatuko direla aurreratu du Garmendiak. Eroskik Sabecoko langileak “greba egitera bultzatu zuten eskaintza baino okerragoa” egin duela jakinarazi du.
