Errepublikako azken Udalbatza omenduko du udalak etzi
Errenteriako Udalak omenaldi berezia prestatu du etzirako: Errepublika garaiko azken Udalbatza omenduko du, 19:00etan, udaletxeko areto nagusian. Ekitaldi berezia izango da, eta ez dira faltako orduko karguak betetzen zituztenen senitartekoak. Ekitaldi...
Errenteriako Udalak omenaldi berezia prestatu du etzirako: Errepublika garaiko azken Udalbatza omenduko du, 19:00etan, udaletxeko areto nagusian. Ekitaldi berezia izango da, eta ez dira faltako orduko karguak betetzen zituztenen senitartekoak. Ekitaldia irekia da, eta herritar guztiak daude gonbidatuta.
Martxoan Udalbatzak aho batez onartu zuen osoko bilkuran garai hartako “alkate, zinegotzi eta funtzionarioen memoria berreskuratzea, frankismoarekin moztuta geratu zen demokraziaren azken aztarna”. Modu horretara, orduko udalak “historiara askatasunaren ukatzaile gisa pasatu direnen aurrean legezkotasuna defendatu” zuela gogoraraziko dute.
Ekitaldi horretan Mikel Zabaleta historialari errenteriarrak hitzaldi bat emango du, eta horrekin batera, Udalbatzaren oroigarri plaka bat ere jarriko dute.
Orduko Udalbatza Paulino Garcia alkateak eta Florentino Loidi, Pio Etxeberria, Juan Jose Urigoitia, Juan Mitxelena, Antonio Garcia, Silvino Lopez, Arturo Prieto, Marino Bermejo, Agustin Bagues, Serapio Mendarte (fusilatua), Niceto Goikoetxea, Ascension Lasa, Jose Ereño, Isidro Bengoetxea eta Jose Antonio Pikabea zinegotziek osatzen zuten. Horien “askatasunarekiko konpromisoa” gogoraraziko dute.
Horrez gain, orduko 35 udal funtzionarioak eta horiek betetako lana aitortuko dute.