Zabalo: “Harrituta gaude ez dugulako jaso Altzatekoen kexu formalik”
Zabalo: «Ez dugu jaso Altzatekoen kexu formalik»
Altamirako Altzate auzo elkarteak deituta, manifestazioa egin zuten auzotarrek joan den larunbatean, jaien egitarauaren barruan, auzoak bizi duen “utzikeria” salatu eta irtenbidea eskatzeko. Ainhoa Zabalo alkateak, “harridura” azaldu du, “Altamirako auzo elkartearen aldetik ez dugulako inolako kexu formalik jaso gaiaren gainean, eta manifestazioaren berri jai egitarauaren bidez izan dugulako”. Zabalok udal ateak herritar guztientzat beti zabalik izan direla nabarmendu du, bestalde, eta udalarentzat auzo eta herritar guztiak berdinak direla gaineratu du. Altzateko kideekin beste gai baten gainean hitz egiteko bildu izan direnean, ahoz auzoan dauden arazoen berri eman izan dutela azaldu du Zabalok, “eta guk ere ahoz erantzun izan diegu, eta azaldu diegu egoera hori Altamiran eta herriko beste auzo askotan ematen ari dela, xentimorik ez dagoelako”.
Auzolanean aritzeko deia
Hala ere, ahal den neurrian sortutako arazoei erantzuten saiatu direla gaineratu du Zabalok: “Kolunpioen gunean apurtuta zeuden losetak hiru aldiz aldatu izan ditugu, baina behin eta berriro apurtu dituzte, eta beste konponbide bat pentsatu beharko dugu”. Altamira “oso garrantzitsua” dela azaldu du bestetik: “Altzate da udal lokal bat duen herriko auzo elkarte bakarra”. Horrekin batera, eta auzotarrek hala eskatuta Altamiran bakarrik bertakoek aparka dezaketela autoa ekarri du gogora zabalok. Horrenbestez, Altamiran zein herriko auzo guztietan hobetzeko asko dagoela aitortuta “diru faltaren aurrean, auzolanaren alde” egiteko deia luzatu die herritarrei alkateak.
