Errenteria-Orereta Bizirik-ek errauste plantaren kontrako protestara deitu du
Igandean giza katea egingo dute errauste plantaren kontra Donostian, 11:30ean Alderdi Ederren. Ekimen horren harira, Errenteria-Orereta Bizirik-ek herritar guztiak deitu ditu hiriburura bertaratzera. Plataformak hondakinen kudeaketak Gipuzkoan duen gat...
Igandean giza katea egingo dute errauste plantaren kontra Donostian, 11:30ean Alderdi Ederren. Ekimen horren harira, Errenteria-Orereta Bizirik-ek herritar guztiak deitu ditu hiriburura bertaratzera.
Plataformak hondakinen kudeaketak Gipuzkoan duen gatazka kritikatu du, eta testuinguru horretan, PSE-EEren jarrera deitoratu du. Gogorarazi du 2006an San Markoko zabortegian bertan Odon Elorza orduko Donostiako alkateak eta Denis Itxaso zinegotziak esan zutela hondakinen arazoa errauste planta eraiki gabe konpon zitekeela. Garai horretan gehiengoa azpiegituraren alde zegoelakoan, “gehiengoa dira, baina oker daude” esan zutela adierazi du Errenteria-Orereta Bizirik-ek.
Egun, ordea, egoera aldatu dela zehaztu du, eta PSE-EEri “arduraz jokatzeko” eskatu dio, “bere jarrera zintzo mantenduz gero errauste plantaren kontrakoak gehiengoa izango baitira Gipuzkoako instituzio guztietan”. Plataformaren arabera, “kalkulu elektoralistak utzi eta interes orokorrak lehenetsi behar dira ingurumena eta herritarren osasuna errespetatzen duten irizpideetan oinarrituta”.
