Momotegiko ahateek tratu txarrak jasaten dituzte, Igualdad Animal-en arabera
Etxaldearen arduradunek zein jatetxeetakoek ez dute gaiaren gaineko erantzunik eman nahi Igualdad Animal, Animalien Eskubideen Aldeko Nazioarteko Erakundeak, salaketa bat jarri dio Momotegi etxaldeari (salaketa administratiboa), eta salaketa hori publiko ere egin du. Taldearen arabera, etxalde horretan dituzten ahateek tratu txarrak jasaten dituzte. Horrez gain, taldearen salaketak jasotzen duenez, «foie gras-a edo gibel-orea saltzen dute Momotegin, inolako higiene edo osasun neurririk» hartu gabe. Esaten duena frogatzeko, idatzi bat eta bideo bat publikatu ditu sarean Igualdad Animal-ek. Taldeko kide batzuk, sektorean interesatuta dauden pertsonak zirela esanez, Momotegira joan ziren urtarrilaren 24an. Bertan, «jabearen baimenarekin», irudiak grabatu eta argazkiak ateratzeko aukera izan zuten. Bideoan Olga Posse jabea ageri da, eta etxaldearen funtzionamenduaren berri ematen die ustezko interesdunei. Taldearen arabera, gainera, material grafiko horren bidez, «frogatuta geratu da» animalien sufrimendua: «Jatera behartzen dituzte ahateak, eta oraindik kontziente direla hiltzen dituzte». Etxaldean araurik ez dutela betetzen ere salatu du Igualdad Animal-ek: «Osasun arauak ez dituzte betetzen, higienikoak ere ez; lizentziarik ez dute, ezta markarik ere, besteak beste». Olga Possek HITZA-ri jakinarazi dio gauzak ez direla elkarteak kontatzen dituen bezala, baina ez duela erantzun nahi, «gaiari duena baino oihartzun gehiago» ez emateko. Taldeak gaineratu du bertan hainbat jatetxe famatutako arduradunek erosten dutela foie-gras-a. Mugaritz jarri [...]
Etxaldearen arduradunek zein jatetxeetakoek ez dute gaiaren gaineko erantzunik eman nahi
Igualdad Animal, Animalien Eskubideen Aldeko Nazioarteko Erakundeak, salaketa bat jarri dio Momotegi etxaldeari (salaketa administratiboa), eta salaketa hori publiko ere egin du. Taldearen arabera, etxalde horretan dituzten ahateek tratu txarrak jasaten dituzte. Horrez gain, taldearen salaketak jasotzen duenez, «foie gras-a edo gibel-orea saltzen dute Momotegin, inolako higiene edo osasun neurririk» hartu gabe.
Esaten duena frogatzeko, idatzi bat eta bideo bat publikatu ditu sarean Igualdad Animal-ek. Taldeko kide batzuk, sektorean interesatuta dauden pertsonak zirela esanez, Momotegira joan ziren urtarrilaren 24an. Bertan, «jabearen baimenarekin», irudiak grabatu eta argazkiak ateratzeko aukera izan zuten.
Bideoan Olga Posse jabea ageri da, eta etxaldearen funtzionamenduaren berri ematen die ustezko interesdunei. Taldearen arabera, gainera, material grafiko horren bidez, «frogatuta geratu da» animalien sufrimendua: «Jatera behartzen dituzte ahateak, eta oraindik kontziente direla hiltzen dituzte». Etxaldean araurik ez dutela betetzen ere salatu du Igualdad Animal-ek: «Osasun arauak ez dituzte betetzen, higienikoak ere ez; lizentziarik ez dute, ezta markarik ere, besteak beste».
Olga Possek HITZA-ri jakinarazi dio gauzak ez direla elkarteak kontatzen dituen bezala, baina ez duela erantzun nahi, «gaiari duena baino oihartzun gehiago» ez emateko.
Taldeak gaineratu du bertan hainbat jatetxe famatutako arduradunek erosten dutela foie-gras-a. Mugaritz jarri dute adibide gisa, eta salaketa jarri diote: «Munduko hirugarren jatetxe onena bezala izendatu dute, baina legea betetzen ez duen etxalde batean erosten du gibel-orea».
Mugaritzek ez dio akusazioari erantzun, eta Andoni Luis Aduriz sukaldariak ere ez du hitzik esan gaiaren gainean, oraingoz.
Hala ere, Igualdad Animal-ek gogorarazi du, Gastronomika 2011 Ferian bideo bat aurkeztu zuela jatetxeak, eta horretan eskerrak ematen zizkiela bere hornitzaileei. Bideo horretan, Momotegi etxaldea ageri da.
Taldeak aipatu dituen beste jatetxeetako batzuk honakoak dira: Akelarre edo Etxeberri. Horiek ere ez dute gaiaren gaineko erantzunik eman.
Animalien babeserako erakundeak urtebeteko ikerketa egin du Espainiako Estatuan, foie-gras-aren gaiari buruz. Produktu hori debekatzeko kanpainaren barruan kokatutako ikerketa da. Lehenengo datuak joan den uztailaren 5ean ezagutarazi zituzten, Bartzelonan (Herrialde Katalanak).
Horren harira, Kataluniako hamar etxalderi jarri diete salaketa. Datozen hilabeteetan ikerketa horren emaitzen berri ematen jarraituko dutela iragarri dute.


