Kaleko margo lehiaketan izena emateko epea ireki dute
Kaleko XIX. Margo Lehiaketa antolatu du Emeki Elkarteak abuztuaren 12rako, Hondarribiko Udalaren eta Atrezzo tailerraren laguntzarekin. Interesa duten guztiei luzatu diete parte hartzeko gonbita. Hori egiteko baldintza bakarra da gutxienez 16 urte iza...
Kaleko XIX. Margo Lehiaketa antolatu du Emeki Elkarteak abuztuaren 12rako, Hondarribiko Udalaren eta Atrezzo tailerraren laguntzarekin. Interesa duten guztiei luzatu diete parte hartzeko gonbita. Hori egiteko baldintza bakarra da gutxienez 16 urte izatea.
Izena emateko 943 64 34 02 telefono zenbakira dei daiteke. Gainera, emekielkartea@hotmail.com posta elektronikora idatzita ere esan dezakete interesdunek lehiaketan parte hartu nahi dutela.
Erakusketa San Pedro kalean
Margolanik txikiena, markorik gabe, 45 zentimetrokoa izango da, eta handiena, berriz, 100 zentimetrokoa. Erabil daitezkeen teknikak ondorengoak dira: olioa, akuarela, akrilikoa, librea eta mistoak. Partaide bakoitzak lan egiteko behar dituen tresnak eta materialak eraman behar ditu.
Parte hartzaile bakoitzak Hondarribiko txoko bat aukeratu behar du koadroa egiteko, eta bukatutakoan, lanak Emekin aurkeztu behar dituzte, sinatu gabe. Ondoren, San Pedro kalean jarriko dute erakusketa eta saritutako lanak Emekirentzat izango dira. Epaimahaia honakoa da: Jabier Sagarzazu, Susana Zaldibar, Karmen Maura, Maite Gorostidi, Jose Gracenea, Aiert Alonso, Fernando Mikelarena, Isabel Apaolaza eta Estela Solana.
Lehenengoak 700 euroko saria eta Emekiren oparia jasoko ditu; bigarrenak, 500 euro eta Hondarribiko Udalaren oparia; hirugarrenak, 400 euro eta CANen oparia, eta Akresit saria eskuratzen duenak enmarkazio bat lortuko du Atrezzo marko dendan. Sariak Emeki elkartean banatuko dituzte eta saririk gabeko lanak egun berean jaso daitezke.
