Kontrako boto bakarrarekin argi berdea eman dio Udalbatzak lonjari
2012-2015 Ekonomia eta Finantza Plana onartu dute, oposizioaren kritika gogorren artean San Pedroko arrandegi berriaren proiektua bere egin du Udalbatzak, herenegun egin zen plenoan, Donibanen. Pasaiako Ezkerrako zinegotzi Xabier Pombok baino ez zuen kontra bozkatu. Gainontzeko talde guztiek alde bozkatu zuten, eta horrenbestez, aldeko 15 boto —PSE-EEko Bixen Itxasok ez zuen plenoan parte hartu— eta kontrako boto bakarrarekin, Portu Agintaritzak Lasarte eta Astigarraga arkitektoek aurkeztutako proiekturen eraikuntzari ekingo dio. Zehazki, zerbitzuguneko arrantza eremuaren xehetasun azterlana da orain onartu dutena. Ika-mikaren ondotik, akordioa Hautsak harrotu ditu azken hilabeteetan lonjaren gaiak, batez ere, udala eta Portu Agintaritzaren arteko desadostasunengatik. Azkenean, baina, akordioa iritsi da. Hori bai, Pasaiako alkate Amaia Agirregabiriak esan zuenez, udalak ez du bere garaian «herritarrekin adostutako parte hartze prozesuan erabakitakoari uko egiteko asmorik», eta orduan erabakitakoa gauza dadin lan egingo dutela esan zuen. Pasaiako Ezkerreko zinegotzi Xabier Pombok, ordea, ezbaian jarri zuen proiektua bere horretan gauzatuko denik, eta «sortutako espektatibetatik oso urruti» geratuko dela esan zuen. Aitzitik, EAJk, «poza» agertu zuen, «azkenean udala eta portuaren artean akordio batera iritsi direlako». Jeltzaleen bozeramaile Nahikari Oterminen arabera, «Pasaiaren biziberritzerako gertaera garrantzitsua da». Edonola ere, «denbora galdu izana» salatu du EAJk, «udal gobernuak Pasaiaren garapena aurrera eramango duten proiektuei heltzeko duen gaitasun [...]
2012-2015 Ekonomia eta Finantza Plana onartu dute, oposizioaren kritika gogorren artean
San Pedroko arrandegi berriaren proiektua bere egin du Udalbatzak, herenegun egin zen plenoan, Donibanen. Pasaiako Ezkerrako zinegotzi Xabier Pombok baino ez zuen kontra bozkatu. Gainontzeko talde guztiek alde bozkatu zuten, eta horrenbestez, aldeko 15 boto —PSE-EEko Bixen Itxasok ez zuen plenoan parte hartu— eta kontrako boto bakarrarekin, Portu Agintaritzak Lasarte eta Astigarraga arkitektoek aurkeztutako proiekturen eraikuntzari ekingo dio.
Zehazki, zerbitzuguneko arrantza eremuaren xehetasun azterlana da orain onartu dutena.
Ika-mikaren ondotik, akordioa
Hautsak harrotu ditu azken hilabeteetan lonjaren gaiak, batez ere, udala eta Portu Agintaritzaren arteko desadostasunengatik. Azkenean, baina, akordioa iritsi da. Hori bai, Pasaiako alkate Amaia Agirregabiriak esan zuenez, udalak ez du bere garaian «herritarrekin adostutako parte hartze prozesuan erabakitakoari uko egiteko asmorik», eta orduan erabakitakoa gauza dadin lan egingo dutela esan zuen.
Pasaiako Ezkerreko zinegotzi Xabier Pombok, ordea, ezbaian jarri zuen proiektua bere horretan gauzatuko denik, eta «sortutako espektatibetatik oso urruti» geratuko dela esan zuen.
Aitzitik, EAJk, «poza» agertu zuen, «azkenean udala eta portuaren artean akordio batera iritsi direlako». Jeltzaleen bozeramaile Nahikari Oterminen arabera, «Pasaiaren biziberritzerako gertaera garrantzitsua da». Edonola ere, «denbora galdu izana» salatu du EAJk, «udal gobernuak Pasaiaren garapena aurrera eramango duten proiektuei heltzeko duen gaitasun eza dela eta».
Ekonomia eta Finantza Plana
2015era arteko Ekonomia eta Finantza Planak ere nahikoa zer esana eman zuen plenoan. Bilduren aldeko 8 botoekin, kontrako 7rekin (PSE-EE, EAJ eta PP) eta Pasaiako Ezkerraren abstentzioarekin atera zen aurrera.
Ekonomia eta Finantza Plana aldundiari eskatutako mailegua eskuratu ahal izateko egin du udalak, Jose Luis Sanz Ogasun zinegotziak azaldu zuenez, mailegu hori eskuratu ahal izateko baldintza gisa. Planaren bidez, udalak sarreretan %5eko hazkundea lortu nahi duela iragarri zuen Sanzek.
Planak, baina, oposizioaren kritika gogorrak jaso zituen, batez ere, PSE-EEren ahotik. «Hau ez da plan ekonomikoa, ez eta finantzarioa ere. Asmoen adierazpen hutsa da, sarrerei dagokionez, tranpa berriak ezkutatzen dituena», salatu zuen Izaskun Gomezek. Planak «zehaztapen falta handia» duela gaineratu zuen PSE-EEren bozeramaileak.
«Pasaitarrek beren zergen bidez ordaintzen dituzten zerbitzuak murriztuz, gobernuaren kudeaketa txarra udalaren kutxan eragiten ari den zulo finantzarioa estali nahi du», PSE-EEren arabera, planak. «Astakeria» dela esan dute, eta Amaia Agirregabiria alkateak aldundiak udalari ezartzen dion baldintza gisa saldu nahi duen «erabateko lardaskeria».
PSE-EEk, ordea, ez du onartzen plana aldundiak jarritako baldintza denik. «Legeak ez bagaitu Plan Ekonomiko eta Finantzarioa egitera behartzen, zergatik behartzen gaitu aldundiak? Zu, gardentasunaren eta parte hartzearen banderaduna, ez al zara pasaitarrei ezkutatzen ariko esku hartutako udala garenik?», galdetu diote sozialistek alkateari, gaiaren harira hedabideetara helarazitako prentsa oharrean.
PSE-EEren ustez, plan horrek «aurrekontuak estaltzen zituen tranpa berberak» errepikatzen ditu, eta egoerak okerrera egin dezakeelako kezka agertu dute, «tranpek gehiagorako emango ez duten unea» iritsiko delakoan.
