Ia 9.000 entzule elkartu dira Moskun sanmartzialetako kontzertuetan
Irungo Udaleko Kultura ordezkari Belen Sierrak aurtengo sanmartzialetako balorazioa egin du, eta “oso pozik” agertu da egitarauko 100 ekitaldiek izandako erantzuna dela eta: “Programa zabala izan da: arte eszenikoak, kirol ekitaldiak, estilo guztietako musika adierazpenak… Denek parte hartze handia izan dute”. Urdanibia plazako kontzertuetan 8.900 lagun zenbatu dituzte; La Pegatinaren emanaldia izan zen jendetsuena (3.000 lagunekin), eta Su ta Gar taldearen saioa ondoren (2.800). Arte eszenikoetako ekitaldiek ere jarraitzaile asko izan dituztela nabarmendu du Sierrak: 6.880 pertsona guztira. Kirol jarduerak Udalak antolatutako ekintzez gain, hiriko elkarteek prestaturiko egitarauak ere «erantzun oso ona» izan duela nabarmendu du Sierrak. Hala, Mariño Kirol Elkartean antolaturiko Eskolen Arteko Futbol Txapelketan 450 haurrek parte hartu zutela, eta Erroibideren 3×3 Basket Txapelketarako 108 kirolarik izena eman zutela nabarmendu du. Kurpil Kirolak-en 60. ekitaldia, San Pedro Eguneko txirrindularitza proba eta halterofilia lehiaketa nabarmendu zituen Kultura arduradunak, beste batzuren artean. Belen Sierraren ustez, “jai parte hartzailegoak izateko bidean urrats bat gehiago egin da”. Ekitaldietan parte hartu zuen jendeaz gain, jaietako kartela eta ekainaren 22ko kontzertuko talde teloneroa herri bozketaz aukeratu zituztela gogorarazi du zinegotziak. Alarde Parekideko Batzordea: «Aurten erabat sendotu da desfile publikoa» Irungo Alarde Parekideko Batzordeak ekainaren 30eko desfilearen balorazio oso ona egin du: “Inoiz baino partaide [...]
Udalak sanmartzialetako parte hartze handia nabarmendu du
Irungo Udaleko Kultura ordezkari Belen Sierrak aurtengo sanmartzialetako balorazioa egin du, eta “oso pozik” agertu da egitarauko 100 ekitaldiek izandako erantzuna dela eta: “Programa zabala izan da: arte eszenikoak, kirol ekitaldiak, estilo guztietako musika adierazpenak… Denek parte hartze handia izan dute”.
Urdanibia plazako kontzertuetan 8.900 lagun zenbatu dituzte; La Pegatinaren emanaldia izan zen jendetsuena (3.000 lagunekin), eta Su ta Gar taldearen saioa ondoren (2.800). Arte eszenikoetako ekitaldiek ere jarraitzaile asko izan dituztela nabarmendu du Sierrak: 6.880 pertsona guztira.
Kirol jarduerak
Udalak antolatutako ekintzez gain, hiriko elkarteek prestaturiko egitarauak ere «erantzun oso ona» izan duela nabarmendu du Sierrak. Hala, Mariño Kirol Elkartean antolaturiko Eskolen Arteko Futbol Txapelketan 450 haurrek parte hartu zutela, eta Erroibideren 3×3 Basket Txapelketarako 108 kirolarik izena eman zutela nabarmendu du. Kurpil Kirolak-en 60. ekitaldia, San Pedro Eguneko txirrindularitza proba eta halterofilia lehiaketa nabarmendu zituen Kultura arduradunak, beste batzuren artean.
Belen Sierraren ustez, “jai parte hartzailegoak izateko bidean urrats bat gehiago egin da”. Ekitaldietan parte hartu zuen jendeaz gain, jaietako kartela eta ekainaren 22ko kontzertuko talde teloneroa herri bozketaz aukeratu zituztela gogorarazi du zinegotziak.
Alarde Parekideko Batzordea: «Aurten erabat sendotu da desfile publikoa»
Irungo Alarde Parekideko Batzordeak ekainaren 30eko desfilearen balorazio oso ona egin du: “Inoiz baino partaide gehiago izan dira, eta jendearen babesa sekulakoa izan da», esan dute, eta aurten lehen aldiz desfilatu dituztenak zoriondu dituzte. «Pozik egiaztatu dugu alarde parekidearen finkatze-bidea aurten erabat sendotua dela”, gehitu dute.
Alarde parekidea “gero eta sendoagoa” ikusten dutelako pozik agertu dira, eta “biziki” eskertu dute aldundiak eta Emakundek emandako laguntza, «haiek ahalbidetzen eta babesten baitute alarde parekidea, emakumeek gizonekin batera berdintasunez parte hartzeko eskubidea bermatzen duen bakarra».
Alarde bakarraren eskaria berretsi dute: “Dagoeneko koadrila, familia, bikote asko desberdintasunen gainetik errespetua jartzeko gauza izaten diren era berean, egunen batean herritar gehienek elkarrekin ospatuko dute jaia, diferentziak diferentzia”.
Tradizionala, “bikaina”
Alarde Tradizionaleko Agintarien Batzordeak ere ekainaren 30eko desfilearen balorazioa egin du. Euren esanetan, “bikaina” izan zen, eta jakinarazi dute 8.145 soldaduk osatu zutela alardea. Agintarien batzordeak txalotu du desfilean parte hartu zutenen jarrera, Herrizaingo Sailak agindutako ordutegiak errespetatu zituztelako. Gainera, jaien aurretik zehaztutako segurtasun plangintza bete zela esan dute.
Irundarrei eskerrak eman dizkiete, entseguetan eta desfilearen unean espaloietan erakutsitako beroarengatik.”Beraiek gabe ezer ez litzateke posible izango”, esan dute. Alarde tradizionala herritarren diru ekarpenekin finantzatzen dela gogorarazi dute euren desfilearen gainekoak azaltzeko egin duten oharrean.
