Eguzkirik ezean, doinuz berotuko dute uda
Oiasso Museoaren aurrean aurkeztu zuten atzo aurtengo udako kultur ekitaldien egitaraua. Eskoleta kalean egin zuten, baina berdin-berdin egin zezaketen Zabaltzan, Genaro Etxeandian, edo beste hainbat lekutan, Irungo Udaleko Kultura Sailak, auzo elkarteek eta beste zenbait eragilek prestatutako ekitaldiak hirian sakabanatuko baitituzte. Arrakasta ziurtatuta duten ohiko ekintzez gain, badira berritasun batzuk, bai ekitaldietan, baita guneetan ere (ikus uztaileko egitarau osoa Nabarmenak atalean). Belen Sierra Kultura ordezkaria eta Jose Maria Rastrilla Irun Hiria Musika Bandako presidentea egon ziren atzoko aurkezpenean, eta uda sasoiko berritasunetako bat kalean egingo diren musika emanaldiak izango direla aurreratu zuten. Horregatik, Triumf saxofoi laukotea izan zen Oiasson, musika tresna eta guzti. “Musikak garrantzia du beti udan, baina aurten beste formatu batean dator. Helburua da daukaguna balorean jartzea, tokiko musikariak”, adierazi zuen Sierrak. Udal Kontserbatorioko ikasle eta Musika Bandako kide diren musikariz osatutako bi laukotek eta boskote batek jardungo dute, baita 22 musikariz osaturiko Big Band batek. Rastrillak ekimen berriaren baliagarritasuna aldarrikatu zuen. “Europan hau normala da, edozein hiritan ikus daiteke, baina hemen ez da ohikoa. Ikusteko dago erantzuna zein den, baina musikari bikainak dira eta nik uste dut polita izango dela”. Laukote eta boskoteen emanaldiak Eskoleta kalean izango dira, eta Big Band-arena Zabaltzako kioskoan. Horiez gain, Irun Hiria [...]
Triumf saxofoi laukoteak parte hartu zuen udako kultur egitarauaren aurkezpenean
Oiasso Museoaren aurrean aurkeztu zuten atzo aurtengo udako kultur ekitaldien egitaraua. Eskoleta kalean egin zuten, baina berdin-berdin egin zezaketen Zabaltzan, Genaro Etxeandian, edo beste hainbat lekutan, Irungo Udaleko Kultura Sailak, auzo elkarteek eta beste zenbait eragilek prestatutako ekitaldiak hirian sakabanatuko baitituzte. Arrakasta ziurtatuta duten ohiko ekintzez gain, badira berritasun batzuk, bai ekitaldietan, baita guneetan ere (ikus uztaileko egitarau osoa Nabarmenak atalean).
Belen Sierra Kultura ordezkaria eta Jose Maria Rastrilla Irun Hiria Musika Bandako presidentea egon ziren atzoko aurkezpenean, eta uda sasoiko berritasunetako bat kalean egingo diren musika emanaldiak izango direla aurreratu zuten. Horregatik, Triumf saxofoi laukotea izan zen Oiasson, musika tresna eta guzti. “Musikak garrantzia du beti udan, baina aurten beste formatu batean dator. Helburua da daukaguna balorean jartzea, tokiko musikariak”, adierazi zuen Sierrak. Udal Kontserbatorioko ikasle eta Musika Bandako kide diren musikariz osatutako bi laukotek eta boskote batek jardungo dute, baita 22 musikariz osaturiko Big Band batek.
Rastrillak ekimen berriaren baliagarritasuna aldarrikatu zuen. “Europan hau normala da, edozein hiritan ikus daiteke, baina hemen ez da ohikoa. Ikusteko dago erantzuna zein den, baina musikari bikainak dira eta nik uste dut polita izango dela”.
Laukote eta boskoteen emanaldiak Eskoleta kalean izango dira, eta Big Band-arena Zabaltzako kioskoan. Horiez gain, Irun Hiria Musika Bandak “hutsuneak beteko” dituela azaldu zuen Rastrillak. Besteak beste, hilaren 20an Luis Marianoren omenezko kontzertua emango dute Zabaltzan, eta 25ean Santiagoko polkak intrepretatuko dituzte Triangeluaren plazan.
