Emakume taldeek “iraintzat” hartu dute Josetxo Ule omentzea
Amalatz, Bilgune Feministak eta Garaipen emakume taldeek “iraintzat” hartu dute aurtengo madalenetan Josetxo Ule omentzea. Ule aurtengo txupinazoa jaurtiko duen Alabergako Tanborradaren zuzendari ohi gisa omentzea onartu du udalak Mit...
Amalatz, Bilgune Feministak eta Garaipen emakume taldeek “iraintzat” hartu dute aurtengo madalenetan Josetxo Ule omentzea. Ule aurtengo txupinazoa jaurtiko duen Alabergako Tanborradaren zuzendari ohi gisa omentzea onartu du udalak Mitxel Blanco Txuri egungo zuzendaria, Mila Urrutia haurren danborradaren zuzendaria eta beti danborradaren atzean izan den Maite Hernandezekin batera.
“Danborrada zuzendu duen urte guztietan, bera zuzendari izan bitartean emakumeak kantinera gisa baino ez zirela aterako publikoki adierazi izan du Ulek”, salatu dute emakume taldeek, eta gogora ekarri dute biztanleriaren erdia diskriminatzen zuten halako ekintzak diruz ez laguntzeko eskatu ziotela udalari talde feministek: “Horren ondorioz, egun Alabergako tanborrada mistoa da eta beste zuzendari bat du”.
Ule omentzeko proposamenak “sorpresa desatsegina” suposatu duela gaineratu dute Bilgune Feministak, Amalatzek eta Garaipenek, “eta udalak memoria eskasa duela erakutsi digu gainera” nabarmendu dute. Horrenbestez Alabergako danborradaren 50. urteurrena ospatzeko “jarrera matxistak saritzen ez dituen moduak bilatzeko” eskatu diote udalari talde feministek, eta jaietan ere “emakume eta gizonen arteko berdintasuna bultzatzeko”.
Gaiaren gainean hitz egiteko, emakume taldeek bilera deitu dute gaur arratsaldeko zortzietatik aurrera Txintxarri elkartean.
