Agur bustia sanferminei
Antxotarrek erre dute azken traka; herenegun agurtu zituzten jaiak, datorren urtera arte, penaz eta bustita Bukatu dira sanferminak. Gaixoa ni abestuz Gure Zumardian bildu ziren herenegun antxotarrak, aurtengo jaiak bukatu direla ospatzeko. Gauerdiarekin batera, zapi gorriak lepotik kendu, eta, ausartenak ur zorrotadaren azpian sartuta, festa giroan agurtu zituzten sanferminak. Aurretik zezensuzkoarekin korrika eta dantzan aritu ziren, eta baita aurten lehenbizikoz antolatutako su festa ikusgarriaz gozatzen. Jaiak agurtzeko ekitaldian, Antxoko Jai Batzordeko kide guztiak igo ziren taula gainera. Baita aurten omendutako erretiratuak ere. Jose Luis Oiarbidek eta Jexu Zabalak jaitsi zituzten ikurrina eta Pasaiako bandera, elizako ordularian hamabiak ematearekin batera. Jai batzordeko kideentzako zein Gure Zumardian bildutako herritarrentzako esker oneko hitzak izan zituen Juanra Cano zinegotziak. «Jaien balorazio oso positiboa» egin zuen, eta denon parte hartzea eskertu. Edonola ere, bihar, 20:00etan, sanferminen balorazioa egiteko bilduko dira. Liskarrik ez Aurtengoak azken urteetako festa baketsuenak izan direla esan daiteke. Azken urteetan ez bezala, gauez ez da borrokarik izan. Hori bai, lapurretak ezin aipatu gabe utzi. Gaztetxean bitan sartu dira lapurtzera, eta dirua eta musika ekipoa eraman dituzte, eta zumardiko txosnan ere saiatu ziren lapurtzen. Etxe batean ere ostu zuten. Parte hartze handia Jai parte hartzaileak bultzatzea izan da Antxoko Jai Batzordearen helburu nagusienetako [...]
Antxotarrek erre dute azken traka; herenegun agurtu zituzten jaiak, datorren urtera arte, penaz eta bustita
Bukatu dira sanferminak. Gaixoa ni abestuz Gure Zumardian bildu ziren herenegun antxotarrak, aurtengo jaiak bukatu direla ospatzeko. Gauerdiarekin batera, zapi gorriak lepotik kendu, eta, ausartenak ur zorrotadaren azpian sartuta, festa giroan agurtu zituzten sanferminak. Aurretik zezensuzkoarekin korrika eta dantzan aritu ziren, eta baita aurten lehenbizikoz antolatutako su festa ikusgarriaz gozatzen.
Jaiak agurtzeko ekitaldian, Antxoko Jai Batzordeko kide guztiak igo ziren taula gainera. Baita aurten omendutako erretiratuak ere. Jose Luis Oiarbidek eta Jexu Zabalak jaitsi zituzten ikurrina eta Pasaiako bandera, elizako ordularian hamabiak ematearekin batera.
Jai batzordeko kideentzako zein Gure Zumardian bildutako herritarrentzako esker oneko hitzak izan zituen Juanra Cano zinegotziak. «Jaien balorazio oso positiboa» egin zuen, eta denon parte hartzea eskertu. Edonola ere, bihar, 20:00etan, sanferminen balorazioa egiteko bilduko dira.
Liskarrik ez
Aurtengoak azken urteetako festa baketsuenak izan direla esan daiteke. Azken urteetan ez bezala, gauez ez da borrokarik izan. Hori bai, lapurretak ezin aipatu gabe utzi. Gaztetxean bitan sartu dira lapurtzera, eta dirua eta musika ekipoa eraman dituzte, eta zumardiko txosnan ere saiatu ziren lapurtzen. Etxe batean ere ostu zuten.
Parte hartze handia
Jai parte hartzaileak bultzatzea izan da Antxoko Jai Batzordearen helburu nagusienetako bat aurten, eta balorazio ofiziala egiteke badago ere, esan daiteke, lortu egin dutela.
Basari elkarteak lehen aldiz antolatutako koadrilen arteko herri kirolen olinpiadan, esaterako, jende askok parte hartu zuen, eta baita ikusle ugari erakarri ere. Parte hartzaile zein ikusle, denek pasatu zuten primeran larunbat arratsaldean. Sei koadrila aritu ziren Gure Zumardian nor baino nor, eta Txabol Sotoko taldeak irabazi zuen.
Ostiralean ere, jende asko ibili zen egunez antolatutako ekimenetan. Gazte Eguneko bazkarira jende asko animatu zen, eta arratsaldean, berriz, batel estropadan, koadrila dezentek parte hartu zuten. Zabaletatarren batelak irabazi zuen estropada. Koadrilen arteko lehia ez ezik, marearen kontrakoa ere izan zen. Mareak gora egin zuen eta batelak estu-estu sartu ziren zubien azpitik.
Igandeko Txabol Sotoko paella jaterako txartelak agortu egin ziren.
Patxi Catalan gogoan
Basari elkarteko danborradan aurten zendutako Patxi Catalan gogoratu zuten, larunbat gauean. Omenaldia egin zioten Azokako agertokian, haren omenez danborrak astinduz. Alargunari oroigarria eta lore sorta eman zizkioten.
