Goi mailako arku tiratzaileak bilduko ditu II. Arku Lehiaketak
Inoiz arku tiraketa probatu ez dutenak eta goi mailako tiratzaileak direnak bilduko ditu, bihar, Ostadar elkarteak antolatutako II. Arku Tiro Lehiaketak. Eguna bi zatitan banatuko dute. Goi mailako arku tiratzaileak ikusteko arratsaldean, 15:15etik aur...
Inoiz arku tiraketa probatu ez dutenak eta goi mailako tiratzaileak direnak bilduko ditu, bihar, Ostadar elkarteak antolatutako II. Arku Tiro Lehiaketak.
Eguna bi zatitan banatuko dute. Goi mailako arku tiratzaileak ikusteko arratsaldean, 15:15etik aurrera pasatu beharko da Fanderiako futbol zelaitik. Aire Zabaleko Gipuzkoako emakumeen txapelduna eta Gipuzkoako zein Euskadiko gizonen txapelduna; Aretoko Gipuzkoako gizon txapelduna eta txapeldunordea; Aretoko Euskadiko emakume eta gizonen txapeldunordeak; eta Aire Zabaleko Euskal Ligako gizonen irabazlea; kadete zein gazte mailetako txapeldunak ikusteko aukera ere izango da.
FITA Nazioarteko Arku Tiraketa Elkarteen Federazioaren 2×10 seriea egin beharko dute partaideek: 36 gezi bi serietan, sei geziko txandatan, eta tiro lerrotik 70 metrora kokatutako dianetara bota beharko dituzte geziak. Lau minutu izango dituzte sei gezi botatzeko.
Lehiaketaren nondik norakoak adierazteko esatari bat ariko da: momentuz momentu gertatzen ari denaren berri emateko ardura izango du.
Hasiberriak, goizean
Goizean, berriz, hasiberrientzako txanda izango da. 11:00etatik 13:00etara elkarteko tiratzaile eta begiraleak arkua jaurtitzen irakasten ariko dira, Fanderiako futbol zelaian bertan. Herritar guztiak animatu dituzte ekimen horretan parte hartzera.
