Babes Zibilari ibilgailu berri bat eman diote
Larrialdiak enpresak ibilgailu bat eman dio Errenteriako Babes Zibilari. Anbulantzia zaharkituta geratu zaio enpresari, eta Babes Zibilari ematea erabaki du berak erabil dezan. Hala ere, ezingo du anbulantzia bezala erabili, furgoneta moduan baizik, et...
Larrialdiak enpresak ibilgailu bat eman dio Errenteriako Babes Zibilari. Anbulantzia zaharkituta geratu zaio enpresari, eta Babes Zibilari ematea erabaki du berak erabil dezan. Hala ere, ezingo du anbulantzia bezala erabili, furgoneta moduan baizik, eta hala nola, materiala eraman edo zaurituei laguntzeko baliatuko du, larrialdi zerbitzuak iritsi bitartean.
Atzo eman zuten horren berri Julen Mendoza alkateak, Josu Martin Larrialdiak enpresako kideak eta Iñaki Jimenez Babes Zibileko boluntarioak.
Jimenezen arabera, egun 4×4 auto bat eta motozikleta bat dituzte, eta furgoneta baliagarri izango zaie, zortzi pertsonentzako tokia daukalako.
Martinek azaldu zuenez, enpresa pribatua izan arren, “funtzio soziala” ere betetzen du, “larrialdietara bideratuta”. Kasu honetan, “pozik” dagoela esan zuen, “ibilbide gehiago ez duen furgoneta Babes Zibilak” erabiliko duelako.
Mendozak, berriz, Babes Zibilean boluntarioek egiten duen lana goraipatu zuen, eta herriak lan hori aitortu behar diela gaineratu. 35 boluntario dabiltza bertan.
Hiru aldeak elkarlanean proiektu gehiago egiteko prest azaldu ziren.
