Iberdrolak pasa den astean jakinarazi zuen Donibaneko termika ixteko eskaera egin ziola Espainiako Industria Ministerioari. Horren harira, Pasaiako alkate Amaia Agirregabiriak eta Lezoko Ainhoa Zabalok agerraldia egin dute, eskaera horren balorazioa egiteko.
![Ainhoa Zabalo eta Amaia Agirregabiria, Lezoko eta Pasaiako alkateak](http://oarsobidasoa.hitza.info/files/2012/06/P6120298-300x225.jpg)
Lehenik eta behin, argi utzi dute prentsan irakurrita jakin zutela Iberdrolaren erabakiaren berri. “Ez dira gurekin harremanetan jarri, eta erakundeekiko errespetu falta iruditzen zaigu hori”, esan du Zabalok. Hala ere, berri hori “pozez” hartu dute bi udaletako ordezkariek, “herritarrek aspaldi egiten zuten eskakizuna zelako”. “Herritarren nahia gauzatu da”, adierazi dute, “baina aspalditik egon behar zuen itxita, zaharkituta zegoelako”. Hala ere, termikak hor irauteko 2022 urtera arte du baimena, eta erabakia ministerioaren esku dagoela gogorarazi dute.
Iberdrolak itxiera eskaera ingurumen arrazoiengatik egin duela iragarri zuen. Horren harira, alkateek adierazi dute termikak legedi ugari “urratzen” dituela, eta Euskal Herrian CO2 gehien botatzen duen enpresa dela gogorarazi dute. Horrez gain, energiaren beherakadaren arrazoia ere hizpide izan zuten alkateek: “Horrek de facto uzten du jokoz kanpo eraiki nahi duten ziklo konbinatuko zentrala”.
Gainera, zentral termikoak egun okupatzen dituen lursailak Lezori eta Pasaiari itzultzeko eskatu dute, “herritarrek erabaki dezaten zer egin horiekin. Noski, kutsadura kenduta eduki beharko dute”. Erabilera publikoa aldarrikatu dute. Badiaren biziberritzean garrantzitsuak izan litezke lur horiek, baina betiere “kanpo kaiari baldintzatuta ez baldin badaude”.
Iberdrolaren termikaren itxiera eskakizunak “azpiegitura faraonikoen eredua agortuta” dagoela iritzi dute Lezoko eta Pasaiako alkateek. “Erede diru xahutzailea eta porlanezkoa agortuta dago; jasanezina da, sostengaezina”. Horregatik “eredu horren defendatzaile” diren PP, EAJ eta PSE-EEri eredu horri buruzko hausnarketa sakona egitea eskatu diete: “Herritarren ongizatea eta zerbitzu publikoak lehenetsi behar dira, eta eraikuntza enpresen interesei babesteari utzi, beste eredu bat egiteko”.
Azkenik, erakundeei zein enpresari elkarlana eskatu diete itxiera modu ordenatuan egiteko.