Donibaneko termika ixtea "Euskal Herriko ingurumenarentzako positiboa" da, Eguzkiren ustez
Iberdrolak Donibaneko zentral termikoa ixteko eskaera egin zuen pasa den astean, eta horren harira Eguzki talde ekologistak balorazioa egin du. Erabaki hori begi onez ikusten dute, “albiste ona baita inguruko bizilagunentzat, ekologistentzat eta herritarrentzat orokorrean”. Horrela, erabaki horrekin Euskal Herria klima aldaketaren nazioarteko itunak betetzea “hurbilago” dagoela esan dute, Donibaneko termika”CO2 gehien sortzen duen Euskal Herriko enpresa baita”.
Oarsoaldeko bizilagunei eragin izan diena gogorarazi du Eguzkik. Horrela, kutsadura atmosferikoa zein akustikoa nabarmendu dituzte. Airearen kutsadurari dagokionez, CO2az gain, azufrea, nitrogenoa eta airean geratzen diren partikulak aipatu dituzte: “Zentralaren isurien ondorio nagusiak bihotzeko eta arnasteko gaixotasunak izan dira, baita ingurumenean zein ekosisteman egin dituen kalteak ere. Begi bistan dagoen ondorioa, bestalde, Meipi inguruko etxeetan zabaldutako arropetan pilatutako kedarra da”. Horien desagerpenaz gain, termika ixteak ekar lezakeen beste ondorio positiboa portua berrantolatzeko geratuko diren 60.000 metro koadroak dira Eguzkirentzat.
Arrazoi ekonomikoak
Talde ekologistak bi arrazoi ekonomiko ikusten ditu zentralaren itxiera eskaeraren atzean. Alde batetik, Pasaiako termika “beharrezkoa” ez dela uste dute, “gaur egun Euskal Herrian kontsumitzen den elektrizitate kopurua baino gehiago ekoizten da. Horrek argi uzten du zentral termikorik ez dela behar”. Horrez gain, Espainiako Industria Ministerioak elektrizitate tarifan egingo dituen aldaketengatik, diru laguntza gutxiago jasoko dute konpainia elektrikoek.
Zentral termikoko 67 langileak ez ditu ahaztu Eguzkik. “Espero dugu Euskal Herrian hain errotuta dagoen Iberdrola bezalako multioazional batek arduraz jokatzea, eta langileak inguru geografiko hurbil batean berkokatzea”.
