Nafarroaren konkista salatzeko mozioa onartu du Udal Gobernu Taldeak
Kaltea aitortzeko eskatu dio udalak Espainiako Gobernuari; gainontzeko zinegotziak abstenitu egin dira Herenegun egin zuten udaletxean maiatzari zegokion ohiko udalbatzarra. Bilduko zinegotziek, Nafarroa Bizirik 1512-2012 taldeak aurkeztutako mozioa onartu zuten. Mozioa onartuta, eragindako kaltea aitortzeko eskatu dio udalak Espainiako Gobernuari. Era berean, udalak «memoria historikoa mantentzeko beharra» aldarrikatu du, eta ekainaren 16an Nafarroa Bizirik-ek antolatuta Iruñean egingo duten martxa nazionalarekin bat egin du. Pello Aramendi zinegotziak hitz egin zuen Udal Gobernu Taldearen izenean: «Gatazka modu baketsuan konpontzeko momentua da, herriari eman behar diogu hitza eta erabakitzeko eskubidea». EAJ eta H1 ordezkatzen dituzten hiru zinegotziak abstenitu egin ziren. Beste puntu batean, eremu urbanoan dauden etxebizitza handiak zatitzeko ordenantza aho batez onartu zuten plenoan zeuden hamar zinegotziek. Dagoeneko indarrean dago ordenantza hori, jendaurrean egon denean ez baitu alegaziorik jaso. Etxebizitzak zatitzeko aukera Hala, ordenantzaren arabera, eremu urbanoan dauden 100 metro koadro baino handiagoak diren etxeak zatitu ahal izango dira, gutxienez, 40 metro koadroko etxebizitzetan. EAJko Aitor Santxezek eskatu zuen gaiaren jarraipena egiteko, «nola doan ikusteko». Zinegotziek plenoan erabakitakoaren arabera, ordenantzaren jarraipena Planeamendu Batzordeak egingo du. Ibargaingo ikasleei bekak Ibargaingo ikasle oiartzuarrentzako laguntzak ere aurrera atera ziren udalbatzarrean. Laguntza horiek jasotzeko baldintzak aldatu egin dituzte, baina Aiora Perez de San Roman alkateak zehaztu [...]
Kaltea aitortzeko eskatu dio udalak Espainiako Gobernuari; gainontzeko zinegotziak abstenitu egin dira
Herenegun egin zuten udaletxean maiatzari zegokion ohiko udalbatzarra. Bilduko zinegotziek, Nafarroa Bizirik 1512-2012 taldeak aurkeztutako mozioa onartu zuten.
Mozioa onartuta, eragindako kaltea aitortzeko eskatu dio udalak Espainiako Gobernuari. Era berean, udalak «memoria historikoa mantentzeko beharra» aldarrikatu du, eta ekainaren 16an Nafarroa Bizirik-ek antolatuta Iruñean egingo duten martxa nazionalarekin bat egin du.
Pello Aramendi zinegotziak hitz egin zuen Udal Gobernu Taldearen izenean: «Gatazka modu baketsuan konpontzeko momentua da, herriari eman behar diogu hitza eta erabakitzeko eskubidea». EAJ eta H1 ordezkatzen dituzten hiru zinegotziak abstenitu egin ziren.
Beste puntu batean, eremu urbanoan dauden etxebizitza handiak zatitzeko ordenantza aho batez onartu zuten plenoan zeuden hamar zinegotziek. Dagoeneko indarrean dago ordenantza hori, jendaurrean egon denean ez baitu alegaziorik jaso.
Etxebizitzak zatitzeko aukera
Hala, ordenantzaren arabera, eremu urbanoan dauden 100 metro koadro baino handiagoak diren etxeak zatitu ahal izango dira, gutxienez, 40 metro koadroko etxebizitzetan.
EAJko Aitor Santxezek eskatu zuen gaiaren jarraipena egiteko, «nola doan ikusteko». Zinegotziek plenoan erabakitakoaren arabera, ordenantzaren jarraipena Planeamendu Batzordeak egingo du.
Ibargaingo ikasleei bekak
Ibargaingo ikasle oiartzuarrentzako laguntzak ere aurrera atera ziren udalbatzarrean. Laguntza horiek jasotzeko baldintzak aldatu egin dituzte, baina Aiora Perez de San Roman alkateak zehaztu zuen aldaketa horiek Ibargaingo arduradunekin eta gurasoekin hitz egin ondoren onartu dituztela.
EAJ abstenitu egin zen, eta H1ek aurka bozkatu zuen.
Garbitania, informazioa
Beste organoen jardueraren jarraipenean, Garbitaniak eta udalak sinatutako hitzarmenari buruzko informazioa eman zuten idazkariek. Udalak eta Garbitaniak 73.000 euroko hitzarmena sinatu dute, atez ateko informazio bulegoa mantentzeko.
EAJk galdetu zuen ea zergatik ez den beste modu batera egiten akordioa, eta alkateak erantzun zion udala Garbitaniako kide izanik, «logikoena» hitzarmen bidez egitea dela. H1eko Xanet Arozenak Garbitaniari buruzko informazioa eta kontuak eskatu zituen: «Oposizio bezala informazioa edukitzeko eskubidea dugu».
143 euro protokolo gastuetan
Maiatzean 143 euro gastatu ditu udalak protokolo gastuetan. 49 euro Aranzadiko kuota ordaintzeko izan dira. Gazte Izanak-en plaka bat ordaintzeko, 30. Eta 64, Nikaraguatik etorritako ordezkaritzari harrera bazkaria ordaintzeko.
