Berriro antolatuko dute eguraldiagatik egin ez zuten gotorlekuen ibilbidea
Irungo Udaleko Ingurumen Sailak eta Behemendi Landa Garapenerako Erakundeak antolatuta, Aiako Harria Parke Naturalean dauden gotorlekuak bisitatzeko joan den larunbatean egin behar zuten mendi irtenaldia atzeratu egin behar izan zuten, eguraldi txarrag...
Irungo Udaleko Ingurumen Sailak eta Behemendi Landa Garapenerako Erakundeak antolatuta, Aiako Harria Parke Naturalean dauden gotorlekuak bisitatzeko joan den larunbatean egin behar zuten mendi irtenaldia atzeratu egin behar izan zuten, eguraldi txarragatik. Esan dutenez, egun gutxitan esango dute data berria zein izango den, baina aurreko larunbaterako izena emana zutenez gain, gehiagorentzako lekua izango dela aurreratu dute.
Ekimena Lapurriturriko informazio guneko egitarauaren barruan zegoen, eta Aranzadi Zientzia Elkarteko aditu batek parte hartu behar zuen; aditu horrek Endarlatsa-Erlaitz lerro gotorlekua erakutsiko zien irteerarako izena emandakoei. Pagogaña gotorlekuko hondakinak, Pikako dorrea eta Erlaitzeko gotorlekuko inguruak bisitatu behar zituzten hilaren 12ko txangoan.
Hala, interesa dutenek Aiako Harrian eraikitako defentsa egituren nondik norakoak ezagutzeko aukera izango dute data berrian: “Parte hartu nahi zuen lagun taldera pertsona gehiago ere sartu ahal izango dira, eta, beraz, irtenaldi hori berriro zein egunetan antolatzen dugun jakiten denean, izena emateko beste epe bat irekiko dugu, parte hartzaileen taldera sartu nahi duen ororentzat”, esan dute.
Behemenditik gogorarazi dutenez, Lapurriturriko etxolak hainbat ekintza antolatuko ditu urria itxi bitarte, besteak beste, izarrak ikusteko gaueko irtenaldia, perretxiko biltzeak, edo iaz arrakasta handia izan zuten orientazioko ibilketak.
