Laikotasunaren aldeko mozioa aurkeztuko du gobernu taldeak hurrengo plenoan
Laikotasunaren aldeko mozioa aurkeztuko du Gobernu Taldeak
Laikotasunaren aldeko mozioa aurkeztuko dutela jakinarazi dute Bildu Koalizioak eta Ezker Anitzak hilaren 29ko udal osoko bilkuran. Gaur goizean egindako agerraldian, Ezker Anitzako Jose Manuel Ferradasek eta Bilduko Luisma Diezek, aurreko korporazioek erantzun izan ez duten “gaiari aurre egiteko unea” dela esan dute, Errenteria-Oreretan dagoen “erlijio aniztasuna” eta “laikotasunerako eskubidea” kontuan harturik. Administrazioak, berdintasun eta laikotasun eskubideak bermatu behar dituela, eta horren harira mozioak “integratzailea” izan nahi duela esan du Diezek: “Ez da erlijioen kontrako mozioa, askotariko sinistun eta ez sinistunen arteko berdintasuna bermatu nahi duen ekimena, baizik”. Ferradasek , mozioa “irekia” dela gaineratu du. Horretarako Errenteria-Oreretako hainbat erlijio taldeetako zein laikotasuna bultzatzen duten taldeetako kideekin harremanetan jarri, eta beste alderdi politiko guztiekin bildu direla azaldu dute, “adostasuna bilatze aldera eta behin betiko mozioa guztion ekarpenekin osatzeko”.
Mozioa ekarpenetara irekia badago ere, nondik norakoak zehaztuta dituztela azaldu du Ferradasek: “Oinarrizkoena, Udalak sinistun eta ez sinistunen arteko berdintasuna bermatu behar duela da”. Horren barruan, Udalak egun ez dituen ongietorri eta agur ekitaldi zibilak egiteko azpiegiturak eta bitartekoak jartzea proposatzen du mozioak. Amaitzeko, udal korporazioak modu ofizialean erlijio kutsua duten ekimenetan parte ez duela hartu behar jasotzen dute gobernu taldea osatzen duten bi alderdiek.
Garrantzitsuena, herritarren artean gaiaren gaineko eztabaida piztea dela gaineratu dute Ferradas eta Diezek, “eta mozioa, horretarako oinarria izan daiteke”.
