Kabiak badauka tokia
Parte hartzaileak ez ezik tokia ere badauka proiektuak. Ostiralean inauguratu zuten Kabia Espazio Kreaktiboa Pontikako aparkalekuan, eta asteburuan bertan estreinatu dute. Egitasmo horretan lanean ari direnez gain, herritar ugari inguratu zen egitura bitxi horretan zer zegoen eta zer egin behar duten argitzera. Kanpoan itxaroten egon ostean, mokadutxoa jateko aukera izan zuten, lehenik, egituraren barrualdean. Ondoren, berriz, hitza hartu zuten egitasmoaren sustatzaileek zein parte hartzaileek. Mikrofonoa hartzen lehenak Arkitektura Kolektiboak taldeko Jon Begiristain eta David Juarez izan ziren. Begiristainek azaldu zuenez, Pontikako egitura hori “abiapuntua” besterik ez da, “hiri osoan hedatuko den mugimendua biltzeko”. Dagoeneko hainbat lantalde eta proiektu martxan daudela gaineratu zuen, baina beste hainbat ere egin daitezkeelako herritarrak parte hartzera animatu zituen. Proiektu horietako batzuk azaldu zituzten, ondoren, lantaldeetako kide batzuek. Teknologia lantaldeak, adibidez, jakinarazi zuen Kabia dagoeneko sarean dagoela. Edonork erabiltzaile bat sortu ahal izango du, eta parte hartu: “Proiektu bakoitzak bere fitxa izango du, eta proiektu horren gainean eztabaidatu ahal izango da”. Agenda bat ere sortzekotan direla adierazi zuten. Teknologiaren alde soziala landuko dutela esan zuten, “gizarte eraldaketarako tresna bezala”. Hala nola, guifi.net sarea, software librearen gaineko hitzaldiak eta tailerrak, eta beste hainbat proiektu egitekotan dira. Kultura lantaldetik, hala nola, musikan lan egiten ari dira, eta kontzertu [...]
Parte hartzaileak ez ezik tokia ere badauka proiektuak. Ostiralean inauguratu zuten Kabia Espazio Kreaktiboa Pontikako aparkalekuan, eta asteburuan bertan estreinatu dute. Egitasmo horretan lanean ari direnez gain, herritar ugari inguratu zen egitura bitxi horretan zer zegoen eta zer egin behar duten argitzera.
Kanpoan itxaroten egon ostean, mokadutxoa jateko aukera izan zuten, lehenik, egituraren barrualdean. Ondoren, berriz, hitza hartu zuten egitasmoaren sustatzaileek zein parte hartzaileek. Mikrofonoa hartzen lehenak Arkitektura Kolektiboak taldeko Jon Begiristain eta David Juarez izan ziren. Begiristainek azaldu zuenez, Pontikako egitura hori “abiapuntua” besterik ez da, “hiri osoan hedatuko den mugimendua biltzeko”. Dagoeneko hainbat lantalde eta proiektu martxan daudela gaineratu zuen, baina beste hainbat ere egin daitezkeelako herritarrak parte hartzera animatu zituen.
Proiektu horietako batzuk azaldu zituzten, ondoren, lantaldeetako kide batzuek. Teknologia lantaldeak, adibidez, jakinarazi zuen Kabia dagoeneko sarean dagoela. Edonork erabiltzaile bat sortu ahal izango du, eta parte hartu: “Proiektu bakoitzak bere fitxa izango du, eta proiektu horren gainean eztabaidatu ahal izango da”. Agenda bat ere sortzekotan direla adierazi zuten. Teknologiaren alde soziala landuko dutela esan zuten, “gizarte eraldaketarako tresna bezala”. Hala nola, guifi.net sarea, software librearen gaineko hitzaldiak eta tailerrak, eta beste hainbat proiektu egitekotan dira.
Kultura lantaldetik, hala nola, musikan lan egiten ari dira, eta kontzertu eta jam session-ak antolatuko dituzte; alegia, musika inprobisazioak. Inprobisazio horiek bertsolaritza eta artearen mundura zabaldu nahi dituztela azaldu zuten. Hain zuzen, Kabian egin zuten lehen ekitaldia kontzertu bat izan zen, larunbatean, Odio eta Ke+da taldeena.
Horiek adibide batzuk dira, baina beste hainbat proiektu martxan daudela jakinarazi dute sustatzaileek. Esaterako, hilaren 24an Emakumea eta Hirigintza formazio tailerra emango dute; 25 eta 26an Don Bosco Kalera erakusketa proiektua eta ekainaren 19an Baratzak Balkoietan ekimena. Beste hamabost ekimen, berriz, oraindik data zehatzik gabe daudela esan dute. Lantaldeen azken bileran 115 kide bildu ziren.
